Memleket basshysy Qasym-Jomart Toqaev Qazaqstannyń ınvestısııalyq áleýetin odan ári arttyrý úshin jańa Konstıtýsııaǵa arnaıy normalar engizilgenin aıtty, dep habarlaıdy Egemen.kz.
Prezıdenttiń aıtýynsha, eldiń ekonomıkalyq damýyn jedeldetý maqsatynda qarjy salasy men qarqyndy damıtyn qalalar úshin arnaýly quqyqtyq rejım qarastyrylǵan.
«Biraq bosańsýǵa bolmaıdy. Tabandy jumys istep, budan da bıik belesterge umtylýymyz kerek. Buǵan elimizdiń áleýeti tolyq jetedi. Atap aıtqanda, jańa Konstıtýsııaǵa memleketimizdiń ınvestısııalyq qýatyn kúsheıtýge arnalǵan naqty normalar qosyldy. Sonyń ishinde qarjy salasyna jáne «qarqyndy damıtyn qalalarǵa» arnaýly quqyqtyq rejım engizý týraly sheshim qabyldandy. Barshańyzǵa málim, men jaqynda «Alataý qalasynyń arnaýly quqyqtyq rejımi týraly» konstıtýsııalyq zańǵa qol qoıdym», dedi Qasym-Jomart Toqaev.
️Memleket basshysy: Qazaqstan shetel ınvestısııasyn tartý kórsetkishi boıynsha aımaqta kósh bastap tur
Memleket basshysy qujat «aqyldy qalaǵa» tán derbes ekojúıeni qalyptastyrýdyń quqyqtyq negizin bekitetinin atap ótti.
«Bul mańyzdy qujatta «aqyldy qalaǵa» tán derbes ekojúıe qalyptastyrýdyń quqyqtyq negizi bekitildi. Arnaıy quqyqtyq rejım memlekettik basqarý múmkindikterin keńeıtýdi, sonyń ishinde sot júıesiniń erekshe jumys isteýin qamtamasyz etedi. Aldyńǵy qatarly retteý quraldary úzdik álemdik tájirıbeni engizýge, ozyq ınnovasııalyq sheshimderdi synaqtan ótkizýge jáne osy biregeı jobany júzege asyrý úshin barlyq qajetti jaǵdaıdy jasaýǵa múmkindik beredi. Bizdiń basty maqsatymyz – Alataý qalasyn bolashaqtyń sıfrlyq aglomerasııasyna, jańa tehnologııalardy tartý ortalyǵyna aınaldyrý. Memleket bıznes ókilderimen ashyq, ózara tıimdi yntymaqtastyqqa daıyn», dedi Prezıdent.
Eske sala keteıik, buǵan deıin Memleket basshysy Qasym-Jomart Toqaev Alataý qalasyna arnaýly mártebe berý týraly Jarlyqqa qol qoıǵan bolatyn.