Shaǵyn suhbat
EQYU-ǵa múshe memleketter syrtqy ister mınıstrleriniń beıresmı kezdesýi aıasynda Uıymnyń Is basyndaǵy tóraǵasy, Qazaqstan Respýblıkasynyń Memlekettik hatshysy – Syrtqy ister mınıstri Qanat Saýdabaev Makedonııa Syrtqy ister mınıstri Antonıo Mıloshoskımen de kezdesken-tin. Kezdesýden soń biz Makedonııa syrtqy saıasat vedomstvosynyń basshysyna birneshe suraq qoıǵan edik.
– Makedonııa búginde Eýropa Keńesine tóraǵalyq etedi, – dedi Makedonııa Syrtqy ister mınıstri Antonıo Mıloshoskı. – Qazaqstan óz kezeginde EQYU-ǵa tóraǵalyq etýde. Osy eki uıymnyń ózara yntymaqtastyǵy búginde de, bolashaqta da erekshe mańyzdy.
– Uıymnyń Is basyndaǵy tóraǵasymen kezdesýde qandaı máseleler áńgime boldy?
– Kezdesýde Qazaqstan men Makedonııa arasyndaǵy yntymaqtastyqty nyǵaıtý máseleleri qozǵaldy. Dálirek aıtqanda, ózara baılanystardy jandandyrý, qaýipsizdikti qamtamasyz etý, adam quqyǵyn qorǵaý máselelerine basa nazar aýdaryldy. Sonymen qatar, Qazaqstan Respýblıkasy men Makedonııa arasyndaǵy dıplomatııalyq tólqujat ıelerin vızalyq talaptardan bosatý týraly kelisimge qol qoıyldy.
– Bıyl Qazaqstanda EQYU sammıtin ótkizý bastamasy jóninde ne aıtasyz?
– EQYU sammıti ótpegeli 11 jyldan asty. Talqylaýdy qajet etetin, sheshimin kútken problemalar jetkilikti. Endi Uıymǵa múshe 56 memlekettiń basshylary bas qosyp, qordalanǵan sol problemalardy jan-jaqty talqylap, olardy sheshýdiń mezgili jetti dep oılaımyn.
– Qazaqstannyń EQYU-ǵa tóraǵalyq etkenine jarty jyldan asty. Pikirińiz qandaı?
Qazaqstan Uıymǵa oıdaǵydaı basshylyq jasap keledi. Aýqymdy baǵdarlamalar daıyndap, ony júzege asyrý úshin Uıymǵa qatysýshy elderdi jumyldyrý ústinde. Búginde Uıym aldynda turǵan ózekti máseleniń biri – Qyrǵyzstandy saıası jaǵynan turaqtandyrý bolyp otyr. Birinshi kezekte bul Uıym tóraǵasy Qazaqstanǵa, sondaı-aq Uıymǵa múshe barlyq memleketterge úlken jaýapkershilik júkteıdi. Al Qazaqstannyń bul jaýapkershilikti oıdaǵydaı oryndaýǵa saıası bedeli de, ekonomıkalyq áleýeti de jetedi.