Qala kúni merekesi aıasynda elordada Jastar kúnine arnalǵan «Special youth party» atty aýqymdy shara ótkizildi. Ony Astana qalasy ákimdiginiń qoldaýymen «DOS» táýelsiz ómir» ortalyǵy múgedekter qoǵamdyq birlestigi, «Nebesnyı lev» qoǵamdyq qaıyrymdylyq qory jáne «Best for Kids» qoǵamdyq qory birlesip ótkizdi.
Astanalyq sırk aldyndaǵy konserttik alańda talantty jastar men múmkindigi shekteýli jandar óner kórsetti. Konsert kezinde barlyq qatysýshylar kóńildi flesh-mobqa qatysty. Bul kúni túrli baǵyttaǵy 7 alań jumys istedi: qalpaqtar saıysy, sýret saıysy, toqyma toqıtyndar arasynda jarys ótkizýge arnalǵan aýmaq, akvarelmen sýret salýshylarǵa arnalǵan jeke aýmaq, qynamen mehendı salýshylarǵa arnalǵan aýmaq. Halyqtyq qolóner sheberleriniń qolynan shyqqan buıymdardan kórme uıymdastyryldy. Budan bólek, dıdjeı Oskardyń qatysýymen bı keshi ótti.
Merekelik sharaǵa 100-den astam adam qatysty. Kelýshiler «Tilek aǵashyna» izgi nıetterin bildirip, lenta baılady. Mereke sońynda barlyq qatysýshylar aspanǵa túrli-tústi sharlar ushyrdy.
Aýqymdy sharanyń maqsaty – múmkindigi shekteýli jandardy elordanyń qoǵamdyq-saıası ómirine keńinen tartý, olar týraly jaqsy pikir qalyptastyryp, qoǵamnyń belsendi músheleri retinde qaraý.
«Egemen-aqparat».