28-29 naýryzda joǵarǵy qysym aımaǵynyń ońtústik sileminde qalǵan Mańǵystaý oblysynyń barlyq jerinde derlik shyǵys, ońtústik-shyǵys baǵytyndaǵy jel kóterilip, jeldiń eń joǵarǵy jyldamdyǵy Túpqaraǵan, Mańǵystaý aýdandarynda 25 m/s-qa deıin jetti. Shańdy daýyl kóterilip, kóriný qashyqtyǵy keı jerlerde 200 m-ge deıin tómendedi.
Mańǵystaýda shańdy daýyl naýryzdyń 28-i kúni keshte bastaldy. Kóz kórsetpeıtin aq shań, ásirese, Shetpe, Aqtaý, Jetibaı, Jańaózen ústin tumshalap alǵan. Sekýndyna 25 metrlik jyldamdyqpen uıtqı soqqan sýyq jel men oǵan ilese alaquıyn bolǵan shań adamdardyń júrip-turýyna, kólikterdiń qozǵalysyna keri áserin tıgizýde. Al turǵyndardyń habarlaýynsha, «Mańǵystaýdyń qyry» sanalatyn Beıneý aýdanynyń keıbir aýmaqtaryna qys qaıta oralyp, aıazdan sý qatyp, úskirik bet qaratpaı turdy.
Qatty jeldiń jáne joldy anyq kórsetpeı búrkep alǵan shańnyń áserinen jeksenbi kúni Jetibaıdaǵy vahtalyq jumysyna bara jatqan jumysshylardy tıegen avtobýs aýdarylsa, Munaıly aýdanynda eki jeńil kólik soqtyǵysyp qaldy. Abyroı bolǵanda, adam shyǵyny joq. Al osy kúni Quryq aýylyndaǵy 1988 jyly salynǵan, biraq osydan birneshe jyldar buryn kúrdeli jóndeýden ótken №6 orta mekteptiń shatyry ushyp ketken. Ushqan shatyr kólemi 1070 sharshy metrdi qurady. Tyǵyz sharýa bolmasa, jolǵa, tipti kóshege shyǵýdyń qaýiptiligi týyndady. Osyǵan oraı, quqyq qorǵaýshylar jol-kólik qatynastarynyń qaýipsizdigi sharalaryn shuǵyl qolǵa aldy.
– Naýryz aıynyń jyly bolyp ótken birinshi jartysynan keıin, Mańǵystaý oblysyna tán, ásirese, kóktem maýsymynda qaıtalanǵyshtyǵy joǵary sınoptıkalyq jaǵdaı oryn aldy. Reseıdiń Eýropalyq bóliginen jyljyǵan skandınavtyq qýatty sýyq antısıklon aǵyny elimizdiń batys aımaǵynda turaqtady. Sondaı-aq, joǵary qysym áserinen sýyq arktıkalyq shepterdiń oblys kólemine yǵysýy, aýa temperatýrasynyń kúrt tómendeýine ákelip soqtyrdy. Kelesi táýlikte, 31 naýryz kúni Qara teńizden jyljyǵan sıklonnyń áserinen Aqtaý qalasy jáne oblysymyzda azdaǵan qar aralas jaýyn-shashyn kútiledi, túnde aýa temperatýrasy 0-5 ºS, keı jerlerde -8 ºS deıin bolmaq, deıdi ınjener-sınoptık D.Ilııasova.
Mańǵystaýda jel men shań tańǵalarlyq qubylys emes, alaıda, bul jolǵy shańnyń túri bólek bolyp tur. Sońǵy eki-úsh jyldan beri jaýyn-shashyny jetkiliksiz bolyp, jeri jutań tartqan óńir turǵyndaryn kóktemniń ala shańmen bastalýy abyrjytyp otyr.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy.
Sýretti túsirgen
Talant QUSAIYN.