Elimiz ejelden el aǵalaryna, ardaqty abyzdaryna, qaǵıdasy qazynaly qarııalaryna qarap, oıyn da, boıyn da túzegen. Talantty tulǵalaryna táý etip, tutqaly tájirıbelerinen úlgi alǵan, eńselerin tiktep, eńbekke de, erlikke de aqylmandardyń aq batasy arqyly bel baılaǵan.
Búgingi egemen elimizdiń mamyrajaı jaǵdaıynda aǵa urpaqtyń qadiri arta túspese kemigen joq. Jastardyń árbir ıgilikti is, tolaǵaı tirligi el aǵalarynyń, aq nıetti aqsaqaldarynyń qoldap-qýattaýymen, aq jol tilep alqalaýymen júzege asyp jatady. Osy oraıda, Uly Jeńistiń 70 jyldyǵyn atap ótýge erekshe kóńil bólinip otyr.
Jeńis ońaı kelgen joq. Jeńis – aǵa urpaqtyń erjúrek batyrlyǵymen, erlik jigerimen keldi. Jeńis tylda eńbek etken árbir azamattyń mańdaı terimen keldi. Jambyl oblysynda 248 Uly Otan soǵysynyń ardageri jáne múgedegi, 500 Uly Otan soǵysyna qatysýshylarǵa teńestirilgender, soǵysqa qatysýshylarǵa teńestirilgen adamdardyń basqa sanattarymen birge, soǵys jyldary 6 aıdan astam tylda eńbek etken 8503 tyl eńbekkerleri bar.
«Bir aıta ketetin jaǵdaı, Densaýlyq saqtaý jáne áleýmettik damý mınıstrliginiń hatyna jáne Parlament Májilisi depýtattarynyń suranysyn basshylyqqa ala otyryp, oblys kóleminde jergilikti bıýdjet esebinen merekeli jáne ataýly kúnderge beriletin áleýmettik kómekterdi bir deńgeıde tólem jasaý týraly sheshim qabyldandy. Uly Otan soǵysynyń qatysýshylary men múgedekterine jáne solarǵa teńestirilgen adamdarǵa jergilikti bıýdjetten beriletin birjolǵy tólemniń mólsherin 150,0 myń teńge, jeńildikter men kepildikter jaǵynan Uly Otan soǵysyna qatysýshylarǵa teńestirilgen adamdarǵa – 30,0 myń teńge, jeńildikter men kepildikter jóninen soǵysqa qatysýshylarǵa teńestirilgen adamdardyń basqa sanattarymen birge soǵys jyldary 6 aıdan astam tylda eńbek etken azamattardy da kómekpen qamtýdy 15,0 myń teńgege kóterý usynyldy. Osy jaǵdaıǵa baılanysty aýdandar jáne qala bıýdjetterinde qajetti qosymsha qarajattyń kólemi anyqtalyp, 122,9 mln. teńgege suranys jasaldy», deıdi bul jóninde Jambyl oblystyq eńbek jáne halyqty áleýmettik qorǵaý basqarmasy basshysynyń orynbasary Sáken Arýbaev.
Jaqynda ǵana Taraz qalasy men aýdandarda turatyn Uly Otan soǵysynyń ardagerleri men múgedekterine arnap «Jeńiske taǵzym» aılyq aıasynda «Qamqorlyq jáne densaýlyq» avtokerýeni, «Jeńis poıyzy» jiberildi. Olar oblysymyzdyń shalǵaı aýdandarynda turatyn Uly Otan soǵysynyń ardagerleri men múgedekterine medısınalyq, áleýmettik-turmystyq kómekter kórsetti. «Jas kezimde beınet ber, qartaıǵanda zeınet ber» degen jasqa jetken ardagerlerimiz memleket tarapynan ózine beriletin kómekter men jeńildekterdi tolyq túrde paıdalanyp otyr.
Buǵan deıin el arasynda ardagerler bas qosyp, keńesip, syrlasatyn jáne demalatyn oryn joq degen áńgime ara-tura aıtylyp qalatyn. Árıne, elimiz, onyń ishinde oblysymyzdyń ósip-órkendeýi jolynda aıanbaı ter tógip, óz úlesterin qosqan aǵa urpaq ókilderi qandaı qurmetke bolsa da laıyq. Mine, sol olqylyqtyń ornyn toltyryp, jaqynda ǵana oblys ortalyǵynan jap-jańa Ardagerler úıi esigin aıqara ashty. Saıabaqtyń ortasynan oryn tepken bul úsh qabatty ǵımaratta ardagerlerge arnalǵan ádistemelik, mádenı is-sharalar ótkizetin jáne demalatyn bólmeler, sondaı-aq medısınalyq kabınet, ashana, bılıard zaldary bar.
Qaı zamanda da týystyqty, birlikti, eldikti saqtaýdy ýaǵyzdaıtyn aqsaqaldar aıtqan ataly sóz aıaqqa basylmaǵan. Búgingi aǵa býyn ókilderiniń basty mindeti – ómirden alǵan tájirıbelerin, erinýdi bilmeıtin, beınetkesh qalyptaryn, otanshyl, eljandy, memleketshil, ultjandy patrıottyq qasıetterin óz urpaǵynyń boıyna jastaı egý bolsa kerek.
Oralhan DÁÝIT,
«Egemen Qazaqstan».
Jambyl oblysy.