Súıinshi!
Elimizdiń Eýropadaǵy tóbebıligi tamasha tabysqa jetkizdi: EQYU-nyń jańa myńjyldyqtaǵy, HHI ǵasyrdaǵy alǵashqy sammıti Qazaqstan tóraǵalyǵy tusynda ótetin bolyp sheshildi.
* Eýropadaǵy qaýipsizdik jáne yntymaqtastyq uıymyna múshe memleketter syrtqy ister mınıstrleriniń beıresmı kezdesýinen eskertkish sýrette álem úshin, qaýipsizdik úshin aıryqsha mańyzdy sheshim qabyldaǵandar beınelengen.
UIYM SAMMITI BIYL ASTANADA О́TETIN BOLDY
Keshe EQYU-ǵa múshe elder syrtqy ister mınıstrleriniń beıresmı kezdesýinde osyndaı sheshim qabyldandy
Almaty oblysynyń Talǵar aýdanyndaǵy “Aqbulaq” sport-saýyqtyrý kesheni tóńiregi óziniń merekelik sán-saltanatymen kóz tartady. Aımaqtaǵy etnomádenı birlestikter ókilderi mártebeli meımandardy ózderiniń ulttyq kıimderin kıip, kerneılete qarsy aldy. Qazaq halqynyń salt-dástúrinen habar beretin at mingen jigitter de osy halyqaralyq shara mazmunyn aıshyqtaı túskendeı. Bul Qazaq eline alǵash at basyn tiregen keıbir sheteldik syrtqy saıasat vedomstvolary basshylary men ókilderi ulttyq naqyshty sezinsin degen ilgeri oıdan týǵany taǵy aqıqat.
Kóp keshikpeı Qazaqstan Respýblıkasynyń Prezıdenti Nursultan Nazarbaevtyń ózi de kórindi. Memleket basshysyna da laıyqty qoshemet kórsetilip, qarsy alyndy. Elbasy alqaly jıyn ótetin orynǵa jetken soń beıresmı kezdesýge kelgen meımandarmen eskertkish sýretke tústi.
Al EQYU-ǵa múshe elder syrtqy ister mınıstrleri beıresmı kezdesýiniń negizgi taqyryptary Uıym jaýapkershiligine kiretin aýmaq qaýipsizdiginiń problemalary, onyń ishinde Qyrǵyzstandaǵy jaǵdaı, aǵymdaǵy problemalardy “Korfý úderisi” arqyly sheshý joldaryn izdestirý, sondaı-aq Qazaqstanda EQYU sammıtin ótkizý týraly kelisimge kelý boldy.
Uıymǵa múshe barlyq elderden ókilder kelgen halyqaralyq deńgeıdegi alqaly jıyndy Qazaqstan Respýblıkasynyń Prezıdenti Nursultan Nazarbaev sóz sóılep ashty. Kelesi kezekte EQYU-nyń Is basyndaǵy tóraǵasy Qanat Saýdabaev, EQYU Parlamenttik Assambleıasynyń Prezıdenti Petros Eftımıý jáne EQYU-nyń Bas hatshysy Mark Perren de Brıshambo sóz sóıledi. Sondaı-aq BUU Bas hatshysynyń orynbasary Iаn Kýbısh BUU Bas hatshysy Pan Gı Mýnnyń syrtqy ister mınıstrleriniń beıresmı kezdesýine qatysýshylarǵa joldaýyn oqyp berdi (Bul sózderdiń barlyǵy jeke jarııalanyp otyr).
Kezdesý sheńberinde “Qaýipsizdik máseleleri jónindegi únqatysýdy odan ári ilgeri jyljytýdyń joldary” degen taqyrypta birinshi sessııa, “Usynylyp otyrǵan EQYU sammıtiniń maqsattary” degen taqyrypta ekinshi sessııa jumys istedi. Olar boıynsha tıisti sheshimder qabyldandy. Sonymen qatar, Taýly Qarabaq kıkiljińin sheshý joldaryn qarastyratyn Mınsk tobynyń otyrysy uıymdastyryldy. Jáne de birqatar eki jaqty kezdesýler bolyp ótti.