AQTО́BE. 4 naýryz. Marat Ospanov atyndaǵy Batys Qazaqstan memlekettik medısına ýnıversıtetinde «Máńgilik el – muratym» atty stýdentter arasynda jas aqyndar músháırasy ótkizildi. Bul týraly egemen.kz tilshisi habarlady.
Ádebı sharany ótkizýdiń maqsaty dárigerlik mamandyqqa oqyp jatqan stýdentterdiń arasyndaǵy poezııaǵa den qoıyp júrgen jas aqyndardyń shyǵarmashylyǵyn nasıhattaý bolyp tabylady. Jas aqyndar músháırasyn ýnıversıtettiń áleýmettik jáne tárbıe jumystary jónindegi ortalyǵy men qazaq tili kýrsy mamandary uıymdastyrdy.
Músháıraǵa osy joǵary oqý ornynyń 1-4 kýrstary arasynan 8 stýdent qatysty. Baıqaý qorytyndysy boıynsha Nurtalap Aıbazar birinshi oryndy jeńip, al ekinshi jáne úshinshi oryndardy Qaljan Baqytjanov pen Gúltursyn Smaılova ıelendi. Múshaıra jeńimpazdaryna ýnıversıtet tarapynan baǵaly syılyqtar tabystaldy.
Satybaldy Sáýirbaı.
Derek: egemen.kz.
Sýret: azh.kz.