Ulttar yntymaǵyn pash etken festıval

Ońtústik astanadaǵy úzdiksiz bilim beretin Almaty ýnıver­sıte­tinde Qazaqstan halqy Assambleıasynyń 20 jyldyǵyna oraı atalmysh oqý ornynda oqıtyn ártúrli ult ókilderiniń qatysýymen «Bir­ligimiz jarasqan, ortaq úıimiz – Qazaqstan!» atty festıval ótti. Sondaı-aq, festıval aıasynda ýnıversıtettegi «Nur Otan» partııasynyń «Jas Otan» jastar qanatynyń músheleri stý­dent­terdi Qazaqstan halqy Assambleıasy Keńesiniń 14 aqpan kúngi basta­ma­synyń negizinde ótetin prezıdenttik saılaýǵa qatysýǵa shaqyrdy. Merekelik is-sharany ashqan ýnıversıtet rektory Baýyrjan Quljabaev dástúrli Joldaýdyń naqty ekonomıkalyq mindetter qoıyp, al sol mindetterdiń tabysty oryndalýy maqsatynda Qazaqstan halqyna birliktiń aýadaı qajet ekenin aıta kelip, elimizdiń bereke, yntymaǵy men saıası turaqtylyǵyna erekshe úles qosyp otyrǵan Qazaqstan halqy Assambleıasynyń qyzmetine joǵary baǵa bere ketti. Al stýdentter atynan sóz alǵan 1-shi kýrs stýdenti Álim Nurahmet ýnıversıtet stýdentteriniń ózin ózi basqarý keńesi men oqý ornyndaǵy «Nur Otan» partııasynyń «Jas Otan» jastar qanatynyń músheleri jınalyp, 14 aqpandaǵy Qazaqstan halqy Assambleıasy Keńesiniń bastamasyn talqylaı kele, onda ál-Farabı atyndaǵy QazUÝ-diń stýdentterine ún qosqandaryn, sóıtip, Qazaqstannyń stýdent-jas­taryna arnap óz úndeýlerin jarııa­laǵandaryn jetkize kele, aldaǵy saılaýǵa tek stýdentterdi ǵana emes, barsha qazaqstandyqtardy bir kisideı qatysýǵa shaqyrdy. Festıvalǵa arnaıy qonaq retinde shaqyrylǵan QHA Keńesiniń múshesi, «Barbang» kúrdter qaýymdastyǵynyń prezıdenti, ǵylym doktory, professor Knıaz Mırzoev: «Búgingi sizderdiń barsha stýdentterge úndeý tastap, bizdiń bastamamyzǵa qoldaý bildirip jatqandaryńyz meni erekshe qýantyp otyr. Osyndaı jastary bar eldiń erteńi úshin alańdamaýǵa bolady», dep rızashylyǵyn bildirse, el birliginiń, qazaq tiliniń baıandy bolýyna ter tógip júrgen Almaty oblystyq ázerbaıjan etnomádenı birlestiginiń, «Memlekettik tilge qurmet» birlestiginiń tóraıymy, «Dostyq», «Parasat» ordenderiniń ıegeri Asyly Osman ýnıversıtet stýdentteriniń ónerine dán rıza boldy. – Aınalaıyn, qaraqtarym! Búgin bizderdi qonaq retinde shaqyryp, osyndaı tamasha konsert qoıyp, elimizdiń jastaryn eldikke, birlikke shaqyratyn úndeý qabyldap jatqandaryń meni qatty tebirentip jiberdi! Saıasatty durys túsingenderiń – myna senderdi oqytyp jatqan ustazdaryńnyń eren eńbegi dep bilemin», – dep tolǵana sóıledi Asyly apaılary. Elimizdiń erteńi bolarlyq ártúrli ult ókilderinen turatyn stýdent-jastardyń kúshimen ótkizilgen merekelik festıval – Qazaqstan halqynyń yntymaǵyn pash etkendeı úlken áser qaldyrdy. Gúlzeınep SÁDIRQYZY, «Egemen Qazaqstan». ALMATY.