Almaty oblysynyń Talǵar aýdanyndaǵy Besaǵash aýylynda 600 oryndyq jańa mektep bıylǵy oqý jylynda shákirtterge esigin aıqara ashty. Bul bilim uıasynyń ashylý saltanatyna Almaty oblysynyń ákimi Amandyq Batalov pen Qazaqstan Respýblıkasy Bilim jáne ǵylym mınıstri Aslan Sárinjipov qatysty.
«Nurly Jol» memlekettik baǵdarlamasy aıasynda boı kóterip, aldy halyq ıgiligine usynylyp jatqan mektepterdiń el keleshegine qosar úlesi orasan ekendigin jetkizgen oblys ákimi Amandyq Batalov aýdan halqyna jańa bilim ǵımaratynyń ıgiligin tatyp, tárbıeli urpaqtyń qyzyqshylyǵyn kórýlerin, bilim berý isinde eńbek etýshi ustazdar qaýymyna atqarar qyzmetteri jemisti bolýyn tiledi.
– Almaty oblysy demografııalyq ósim jóninen qarqyndy nátıje kórsetip kele jatqan aımaq. О́ıtkeni, munda ózge óńirlerden kóship kelýshiler sany óte kóp. Bıyl osy óńirdiń ózinde 18 jańa mektep ashylyp, oblys aýmaǵyndaǵy halqy eń tyǵyz ornalasqan eldi mekenderdegi jastarymyzdyń bilim alýyna kóptegen jeńildikter jasalynbaq. Osyndaı jańa mektepter ashý arqyly biz úsh aýysymdy mektepter men apatty jaǵdaıdaǵy bilim ordalarynyń máselesin túbegeıli sheshetin bolamyz, – dedi Bilim jáne ǵylym mınıstri Aslan Sárinjipov.
Besaǵashtyqtardyń qýanyshyn bólisýge kelgen Parlament Májilisiniń depýtaty Álıhan Toıbaev, Talǵar aýdanynyń ákimi Raıhan Sadyqova jańa mektepten túlep ushatyn jas býyn ókilderi oqýda ozat bolatyndaryna senim bildiristi.
Besaǵash aýylyndaǵy №45 mektep gımnazııasynyń qurylys jumysy 2014 jyly bastalyp, respýblıkalyq jáne jergilikti bıýdjetten 1 mıllıard 187 mıllıon teńge qarjylaı qoldaýǵa ıe bolǵan edi. «Altaır» JShS bas merdiger bolyp, dittegen ýaqytynda tapsyrylǵan qurylystyń jalpy kólemi 3060 sharshy metr.
Jańa mektepte 45 oqý kabıneti, 3 sheberhana, 1 mýltımedııalyq kabınet, jańa úlgidegi hımııa, fızıka, bıologııa jáne ınformatıka kabınetteri, 575 sharshy metrlik sport zaly, 200 oryndyq ashana jáne medısınalyq bólmesi bar. Budan ózge, kitap qorynda 3000 ádebı jáne 6000 oqýlyqpen qamtylǵan kitaphana men oqý zaly, oqýshy qyzdar úshin tigin, al uldar úshin aǵash pen metall óńdeıtin sehtar bar. Eńbek sabaǵyn ótkizý úshin barlyq qural-saıman men kerekti jabdyqtar tolyq jeterlik.
Ázirge 60 muǵalim qyzmet atqarǵaly otyrǵan jańa mekteptiń ashylý saltanatyna aýyl turǵyndary erekshe kóńil-kúımen qatysyp, aqsaqaldar jastarǵa bata berip, jańa bilim jolynda úlgili bolýlaryna tilek qosty.
Qalyqtaǵan shattyqtyń qanatynda án,
Qýanyshtyń jyrynan dala tunǵan.
Mektebimiz jarandar qutty bolsyn,
Besaǵashtyń tórinen jańa ashylǵan!
– dep Arman Ádilǵazy esimdi shákirt jyr arnap, ónerpaz oqýshylar án-bıden shashý shashty.
Qanat ESKENDIR,
«Egemen Qazaqstan».
Almaty oblysy.
Sýretterdi túsirgen
Jumabaı MUSABEKOV.