Áleýmettik jaǵdaıdy jaqsartýǵa baǵdar

Keshe Astana qalasy ákimdiginde Premer-Mınıstrdiń orynbasary Berdibek Saparbaevtyń tóraǵalyǵymen «Turǵyndardyń áleýmettik áleýeti – Astana brendi» atty keńes bolyp ótti. Keńes jumysyna Densaýlyq saqtaý jáne áleýmettik damý mınıstri Tamara Dúısenova, Bilim jáne ǵylym mınıstri Aslan Sárinjipov, Mádenıet jáne sport mınıstri Arystanbek Muhamedıuly jáne respýblıkalyq uıymdardyń, qalalyq basqarmalardyń, joǵary oqý oryndarynyń, medısınalyq mekemelerdiń basshylary qatysty. Memleket basshysynyń tapsyrmasymen Qazaqstan Úkimeti ákimdikter men iri kásiporyndardyń, ortalyq memlekettik organdardyń arasynda óndiristik úrdisterdi turaqtandyrý, eńbekkerlerdiń eńbek quqyǵy men kepildikterin qamtamasyz etý jónindegi ózara yntymaqtastyq memorandýmdaryn bekitý jóninde keń kólemdi jumystardy is júzine asyrýda. Elorda ákimdigindegi alqaly jıyn da naq osy mańyzdy sharaǵa arnalǵan. «Álemdik ekonomıkalyq daǵdarystarǵa qaramastan bizdiń elimizde áleýmettik salaǵa bólingen shyǵyndar eshbir qysqartýǵa ushyraǵan joq jáne bıylǵy jyly ol 4 trıllıon teńgeni qurap otyr. Ekonomıkalyq daǵdarys jaǵdaıynda Úkimettiń basty mindeti – turǵyndardy eńbekpen qamtý jáne jumyssyzdyqty boldyrmaý. Búginde biz osy bıik maqsattardy is júzine asyrý jolynda keshendi jumystar atqarýdamyz», dedi Premer-Mınıstrdiń orynbasary óz sózinde. Úkimet basshysynyń orynbasary atap kórsetkendeı, Elbasynyń tikeleı tapsyrmasymen elimizde áleýmettik saladaǵy daǵdarys qıyndyqtary barynsha jeńil bolý úshin tıimdi joldar qarastyrylýda. «Nurly Jol» baǵdarlamasy boıynsha áleýmettik salanyń nysandaryn salý máselesine basymdyq berilip otyr. Osy oraıda respýblıkalyq bıýdjettiń qarjysy esebinen Astanada 17 áleýmettik nysan qurylysy salynbaq. Sonymen birge, mektep jasyna deıingi balalar mekemeleriniń tapshylyǵyn azaıtý, apatty jáne úsh aýysymda jumys isteıtin mektepterdi boldyrmaý baǵytynda nátıjeli jumystar atqarylmaq. Qazirgi tańda Astanada 1 apatty jáne úsh aýysymmen jumys isteıtin 3 mektep bar. 2017 jyly elordada bul problema tolyq sheshimin tabady. Elorda turǵyndaryna medı­sınalyq qyzmet kórsetý jaǵdaıyn jaqsartý maqsatynda birqatar sharalar júzege asyrylmaq. Bul rette qaladaǵy medısınalyq mekemelerdiń materıaldyq jabdyqtalýyn jaqsartý jáne kadrlarmen tolyq qamtamasyz etý úshin tıisti sharalar belgilengen. Elimizde medısına mamandaryn daıarlaıtyn 7 joǵary oqý ornyn jyl saıyn 4 myńǵa jýyq mamandar bitirip shyǵady. Aldaǵy ýaqytta medısınalyq kadrlardyń sapasyn jaqsartý maqsatynda birqatar sharalar atqarylady. Elimizde jumyssyzdyq deńgeıi 5 paıyz bolsa, Astanada bul kórsetkish odan da tómen. Aldaǵy ýaqytta ın­dýstrııalyq-ınnovasııalyq baǵ­darlamany júzege asyrý barysynda elordada 4 myń jańa jumys orny ashylmaq. «Astana bıznesti damytýdyń lokomotıvi bolyp tabylady. El­ordada joǵary tehnologııalyq óndiris oshaqtary molynan sho­ǵyr­lanǵan. Bas qalamyzda sheteldik tanymal bıznes ókilderiniń já­ne bıznes qurylymdarynyń qa­tysýymen halyqaralyq forýmdar ótkizilip turady. Búginde árbir qazaqstandyqtyń elordadaǵy mádenı-qoǵamdyq jáne saıası ómirge belsendi aralasýǵa tolyq múmkindigi bar. Bolashaqta biz elorda turǵyndarynyń áleýmettik áleýetin jaqsartý maqsatynda qoldan kelgenniń bárin jasaıtyn bolamyz. Astanalyqtar úshin «Turǵyndardyń áleýmettik áleýeti – Astana brendi» atty qaǵıda bas­ty baǵdarǵa aınalýy kerek», dep atap kórsetti B.Saparbaev. Keńes qorytyndysynda Astana ákimdigi mınıstrliktermen 2015-2017 jyldary densaýlyq saq­taý, mádenıet, sport, áleýmet­tik qorǵaý, jumyspen qamtý jáne bilim berý salalarynda ynty­ma­q­tastyqty qamtamasyz etý memo­randýmdaryna qol qoıdy. Atap aıtqanda, qala ákimi Ádilbek Jaqsybekov pen Densaýlyq saqtaý jáne áleýmettik qorǵaý mınıstri T.Dúısenova jumyspen qamtý tıimdiligin arttyrý jáne elorda turǵyndaryn naqty áleýmettik qorǵaý jáne kómek kórsetý maqsa­tyn­daǵy jáne turǵyndardyń den­saýlyǵyn jaqsartý maqsa­tyn­daǵy memorandýmdarǵa qol qoısa, Mádenıet jáne sport mınıstrligimen tarıhı-mádenı muralardy damytý, etnos­aralyq kelisimdi saqtaý, ulttyq tildi jáne mádenıetti damytý kon­fessııaaralyq teńdik pen dıalogty qamtamasyz etý maqsatyndaǵy yntymaqtastyq memorandýmyna qol qoıyldy. Bilim jáne ǵylym mınıstrligi men ákimdik arasyndaǵy bilim berýdi damytý jónindegi memorandým aıasynda, «Bıotehnologııa ulttyq ortalyǵy» ǵylymı-ınnovasııalyq keshenin, «Astana Business Campus» ǵylymı parkin qurý, qurylys jáne turǵyn úı kommýnaldyq-sha­rýashylyǵy, energetıka, týrızm, qonaq úı bıznesi, aq­parat­tyq-kommýnıkasııalyq teh­no­logııa mamandaryn daıarlaý jó­­nindegi «AstanaPolytechnic» teh­nıkalyq joǵary mektepterin ashý kózdelingen. Keńeske qaty­sý­shylardyń biraýyzdy pikirinshe, májilis barysynda bekitilgen memorandýmdar Astana qalasynyń áleýmettik áleýetin arttyrýǵa serpin beredi. Jylqybaı JAǴYPARULY, «Egemen Qazaqstan».