AQTО́BE. 14 qazan. Aqtóbedegi Marat Ospanov atyndaǵy Batys Qazaqstan memlekettik medısınalyq ýnıversıtetinde jastardyń dinı ekstremıstik toptarǵa tartylýyna jol bermeý maqsatynda «Ańsar» aqparattyq-nasıhattyq tobynyń mamandarymen ekstremızm men terrorızmniń aldyn alý máseleleri boıynsha birinshi kýrs stýdentterimen kezdesý ótkizildi. Bul týraly egemen.kz tilshisi habarlady.
Qazirgi tańda dinı ekstremızm men terrorızm eń ózekti másele bolyp otyr. Oǵan naqty mysal, Túrkııa men Sırııa, Lıvııa men Pákstandaǵy jaǵdaı bolyp tabylady. О́z elimizdegi Taraz, Almaty qalalaryndaǵy, batys óńirindegi oqıǵalar da alańdaýshylyq týǵyzýda. Kóbine dinı fanattardyń arbaýyna jastar túsip qalyp jatady. Olardy ınternet arqyly qatarlaryna tartatyny da jasyryn emes. Osy jáne basqa da dinge qatysty máseleler tóńireginde stýdenttermen keleli áńgime ótkizilgen shara terrorızm týraly áleýmettik beınebaıan kórsetýmen bastaldy. Sodan keıin «Ańsar» aqparattyq-nasıhattyq toby basshysynyń orynbasary Aslanbek Tynyshtyq ekstremızm jáne terrorızm týraly tereń túsinik berdi, ekstremıstik toptar jáne dinı fanattardyń sol toptarǵa tartý ádisteri týraly áńgimeledi.
Ol Qazaqtan aýmaǵynda 5 dinı uıymnyń ekstremıstik jáne 14 uıymnyń terrorıstik topqa jatatynyn atap ótti. Olardyń qatarynda «Al-Kaeda», «Djýıd al-Halıfat» jáne basqalary bar.
Stýdentter kóterilip otyrǵan máselege qyzyǵýshylyq tanytyp, djıhad degen ne, radıkaldyq toptardyń qataryna qalaı túsip qalmaý kerek, ekstremıstik toptardy qalaı ajyratýǵa bolady degen sııaqty kóptegen saýaldar qoıyp, tolyq jaýap aldy.
Satybaldy Sáýirbaı.
Derek, sýret: egemen.kz.