ASTANA. 26 tamyz. Búgin «Astana» fýtbol komandasy ÝEFA Chempıondar lıgasy irikteý týrnıriniń pleı-off básekesi sheńberinde qarymta kezdesýin ótkizedi. Atalǵan synda elordalyqtardyń qarsylasy Kıprdiń APOEL komandasy ekeni belgili. Bul týraly egemen.kz habarlady.
Kıprdiń Nıkosııa qalasynda oınalatyn oıyn Astana ýaqytymen saǵat 00:45-te bastalady. Matchty «Tań» telearnasy tikeleı efırde kórsetedi. Sondaı-aq, Astana qalasynyń ákimdigi shahardaǵy «Qazmedıa» ortalyǵynyń aldynda ornalasqan úlken ekrandar arqyly da onlaın-kórsetilimder uıymdastyrýdy kózdep otyr.
Qos komanda arasyndaǵy alǵashqy oıynda «Astana» 1:0 esebimen jeńiske jetken edi. «Astana Arena» sport kesheninde ótken sol kezdesýde soǵylǵan jalǵyz gol Baýyrjan Jolshıevtiń atyna jazyldy. Sondyqtan búgingi matchta bizdiń komandaǵa toptyq saıysqa joldama alý úshin kez kelgen teń nátıje jetkilikti.
Sonymen qatar, búgin APOEL – «Astana» oıynynan bólek, týrnır sheńberinde taǵy tórt qarymta kezdesý ótedi. Ol synda myna komandalar tartysqa túsedi:
«Partızan» (Belgrad, Serbııa) – BATE (Borısov, Belarýs)
«Baıer» (Leverkýzen, Germanııa) – «Lasıo» (Rım, Italııa)
«Brıýgge» (Brıýgge, Belgııa) – «Manchester Iýnaıted» (Manchester, Anglııa)
SSKA (Máskeý, Reseı) – «Sportıng» (Lıssabon, Portýgalııa)
Aıta keteıik, ótken túnde irikteý týrnıri arqyly Chempıondar lıgasynyń toptyq saıysyna joldama alǵan alǵashqy bes komanda belgili boldy. Ol týraly myna jerden bile alasyzdar.
Elaman Qońyr.
Derek: egemen.kz.
Sýret: footboom.kz.