Gaz keldi, gazben birge «jaz» keldi

Qyzylorda oblysynyń aýdan ortalyqtary men aýyldaryn gazben qamtý isi qyzý júrip jatyr. Kógildir otyn eń alǵash bolyp Jańaqorǵan aýdanyna jetti. Osylaısha 25 myńnan astam adam turatyn aýdan ortalyǵy otyn men kómirdiń qıynshylyǵynan qutyldy. Eń bastysy, elimiz boıyn­sha alǵash ret bir aı ishinde oblys­tyń birden bes aýdany gazben qam­tamasyz etiledi. 10 qazan kúni Qyzylorda oblysynyń ákimi Qy­rymbek Kósherbaev pen «QazTrans­Gaz Aımaq» AQ-tyń bas dırektory Ibýlla Serdıev Jańaqorǵan aýdanynda gaz berý sátine kýá bolyp, kóptiń qýanyshymen bólisti. Aıta keteıik, Qyzylorda oblysy ákimdigi men «QazTransGaz» AQ arasynda byltyr jasalǵan memorandýmǵa sáıkes Jańaqorǵan, Shıeli, Qazaly jáne Aral aýdandary men Baıqońyr qalasyn gazdandyrýǵa qajetti qarajat bólingen. Al oblystyń qalǵan aý­dan­dary kelesi jyly gazben qam­tylatyn bolady. Bul jumystarǵa qajetti 16 mıllıard teńgeni Eýropa qaıta qurý jáne damý banki ınvestısııalaıtyn bolady. «Aýdan halqy endi pesh ja­ǵyp, kúl shyǵarý mashaqatynan qutylatyn boldy. Bárimiz úshin arman bolǵan kógildir otyn úıimizge jetti. Budan artyq qandaı qýanysh bolsyn», deıdi jańaqorǵandyq Gaýhar Bekmyrzaeva. – Elbasy eldi mekenderdi kógildir otynmen qamtamasyz etýge basty nazar aýdarýdy tapsyrǵan. Bul sonyń jemisi. Jalpy alǵanda, oblys­ta áleýmettik máseleler tıimdi sheshilip keledi «Beıneý-Bozoı-Shymkent» magıstraldi gaz qubyry jáne «Batys Eýropa – Batys Qytaı» halyqaralyq tas joly salyndy. Endi aýdan ortalyqtaryna gaz jetkizetin qubyrlar salynyp bitti. Aldaǵy ýaqytta jańaqorǵandyqtar úshin sheshimin tappaǵan kúrmeýi qıyn másele aýyz sýdyń jaǵdaıy da ońynan sheshilmek. Sý qubyrlaryn salý jobasy 2016-2018 jyldarǵa josparlanǵanymen, biz jumysty bıyl bastaı berýge sheshim qa­byl­dap, jaqynda alǵashqy 200 mıllıon teńgeni bóletin boldyq. Taıaýda jumys bastalady. Osylaısha, ret-retimen halyqtyń tirshiligi úshin qajetti máselelerdi sheshe beremiz,– dedi Qyrymbek Eleýuly. Jańaqorǵanǵa gaz jetkizgen «QazTransGaz Aımaq» AQ-tyń bas dırektory Ibýlla Serdıev te aýdan jurtshylyǵynyń qýa­ny­shymen bólisti. – Bizdiń jobamyzdyń basty ereksheligi – oblysqa otandyq gaz jetkiziletin bolady, ıaǵnı gaz toq­taýsyz beriledi. Halyqtyń áleý­mettik az qamtylǵan toptaryna jeńildikter qarastyrylǵan. Tur­ǵyndardyń jaǵdaıyna qaraı oty­ryp, paıyzy tómen nesıe­ler arqyly birtindep tóleý múm­kindigin de oılastyrdyq. Sonymen qatar, tamyz ben qazan aralyǵynda pesh jáne esepteýish quraldaryn satyp alýshylarǵa 45 paıyzdyq jeńildik beriledi, – dedi ol. Jańaqorǵandyqtardyń qýa­nyshynda shek joq. Talaı jyl­ǵy armandary oryndalǵan aýdan turǵyndarynyń atynan ardagerler keńesiniń tóraǵasy Zı­nab­dın Shermaǵanbet quttyqtaý sóz sóılep, Elbasyna Syr jurt­shy­lyǵynyń atynan alǵys aıtty. Osy aptada Shıeli aýdanyn gazdandyrý bastalady, odan keıingi kezekte – Qazaly jáne Aral aýdandary bar. Erjan BAITILES, «Egemen Qazaqstan». Qyzylorda oblysy.