AQTО́BE. 2 sáýir. Búgin Aqtóbe jerine jumys saparymen kelgen Qazaqstan Prezıdenti Nursultan Nazarbaev baǵdarlamaǵa saı oblystyq kópsalaly aýrýhanany aralap kórdi. Bul týraly egemen.kz tilshisi habarlady.
Aýrýhana aýmaǵynda Elbasyna oblystaǵy densaýlyq saqtaý salasynyń damý barysy týraly esep berildi. Osy jerde Memleket basshysy emdeý ornynyń jumysymen tanysyp, ujym múshelerimen jáne oblystyń medısına qyzmetkerlerimen júzdesti. О́z kezeginde Nursultan Nazarbaev aýrýhananyń jańa ǵımaratta ornalasqanyn, zamanaýı quraldarmen jabdyqtalǵanyn atap ótti.
«Kóp nárse endi sizderge baılanysty. Eger óz jumystaryńyzdy sapaly atqaryp, qolda bar jabdyqtardyń múmkindigin tolyq paıdalanatyn bolsańyzdar, halyq densaýlyǵyn jaqsartýǵa zor úles qosasyzdar. Bizdiń elimizde densaýlyq saqtaý salasyna zor kóńil bólinip otyr, Qazaqstan jan basyna shaqqanda bul salaǵa bólinetin qarajat kólemi jóninen damyǵan elder deńgeıine taıap keledi. Respýblıkada sońǵy 20 jylda myńǵa jýyq densaýlyq saqtaý nysany salyndy. Halyq otandyq medısınaǵa senim arta bastady, al kórshi elderdiń azamattary emdelý úshin bizge keletin boldy», – dedi Memleket basshysy.
Sońynda Nursultan Nazarbaev medısına qyzmetkerlerine tabys jáne baq-bereke tiledi.
Aýrýhana qyzmetkerleri Qazaqstan Prezıdentine respýblıkada densaýlyq saqtaý salasyn damytýǵa, biliktilikti arttyrýǵa jáne tájirıbe almasýǵa qajetti jaǵdaı jasalǵany úshin alǵys aıtty.
Memleket basshysy jaqsy baǵa bergen 320 tósektik aýrýhana «100 mektep jáne 100 aýrýhana» memlekettik baǵdarlamasy aıasynda salynǵan. Mekeme halyqaralyq standartqa saı boı kóterip, zamanaýı dıagnostıka jáne emdeý quraldarymen jabdyqtalǵan.
Aýrýhana qurylymyndaǵy 29 bólimsheniń endokrınologııa, otolarıngologııa, ýrologııa, qan tamyrlary hırýrgııasy, gıperborııalyq oksıgenasııa dep atalatyn 5-eýi oblystaǵy birden-bir ortalyq bolyp tabylady. Qazirgi tańda munda 104 dáriger (sonyń 55-i biliktilik sanattaryna ıe), 283 orta medısınalyq bilimi bar mamandar jumys isteıdi.
Satybaldy Sáýirbaev.
Mánbe: egemen.kz.