PETROPAVL. 21 mamyr. Eýropanyń shyǵys óńirinen soqqan kúshti sıklon Qyzyljar óńirin de úlken ábigerge saldy. Bul týraly oblystyq tótenshe jaǵdaılar jónindegi departamentiniń mamandary habarlady.
Sekýndyna 29-31 metr jyldamdyqpen ekilene, elire soqqan jel emen aǵashtardy tamyrymen julyp áketip, kóshelerdi áp-sátte jaıratyp saldy. Aýa raıy kúrt tómendep, qysqy baqtyń shatyry qańbaqsha domalap tústi. Birneshe kóliktiń ústine aǵashtar qulap, qatty zaqymdandy. Oblys ortalyǵyndaǵy Toqsan bı kóshesinde elektr baǵanalaryna nuqsan kelip, jaryq berý toqtatyldy.
Tımırıazev, Shal aqyn aýdandarynda jeldiń jyldamdyǵy sekýndyna 30-31 metrge deıin jetti.
«Reseı Federasııasynyń eýropalyq bóliginen jetken sıklon jaıly aldynala eskertilgenin qaramastan, onyń kúshi biz kútkendegiden de asyp tústi. Áıteýir, adam shyǵyny joq. Mundaı qolaısyz jaǵdaı alda qaıtalanady dep kútilýde», deıdi «Qazgıdromet» RMK jergilikti fılıalynyń bólim bastyǵy Gúlzat Ǵazızova.
О́mir Esqalı.
Derek: Soltústik Qazaqstan oblystyq tótenshe jaǵdaılar jónindegi departamenti.
Sýret: egemen.kz