Qyzyljar óńirine kelip qyzyqty konsert qoıdy
Petropavldyqtar Ońtústik Amerıkany meken etken úndis taıpalarynyń biri kıchýa ekenin Ekvador Respýblıkasynan kelgen «Qandas baýyrlar» etnomýzykalyq tobynyń múshelerinen estip bildi. Onyń quramynda kópten beri óner kórsetip kele jatqan Alberto Maralıs Chısa jáne Ernesto Agılar esimdi talantty ánshiler júrgen jerlerinde kıchýa úndisteriniń mýzykasyn talmaı nasıhattap, ónerde shekara bolmaıtynyn uqtyrýdy dástúrge aınaldyrypty. Qyzyljar óńirinde de ulttyq aspaptarda náshine keltire oınap, tamyljyta án shyrqap, kórermenderin rıza etti.
– Shyǵarmashylyq topty «Qandas baýyrlar» dep ataýymyzda úlken mán bar. Ondaǵy maqsat–ata-baba mekeninen eriksiz qýylyp, rezervasııaǵa ushyraǵan úndisterdiń salt-dástúrin, ádet-ǵurpyn, tilin, mádenıetin pash etý, deıdi ánshiler.
Ekvador Respýblıkasynyń Otavalo astanasynan shyǵyp, álemdi sharlap kele jatqan kóńildi jigitter oblys ortalyǵynda birneshe kún aıaldap, qyzyqty konserttik baǵdarlamalar usyndy. Ulttyq kıimderi boılaryna jarasyp, samponııa, pana, kena sekildi ulttyq aspaptarda quıqyljyta oınady. Kúndelikti nápaqalary men jol shyǵyndaryn óteý úshin ózderimen ala kelgen ekzotıkalyq buıymdar men kúıtabaqtardy saýdalady. Kóbine «marhabat», «rahmet» sózderin jıi qoldanyp, ystyq yqylastary men rızalyq sezimderin bildirip jatty.
Ánshiler qoshtasarda Qazaqstannyń, turǵyndardyń qatty unaǵanyn, dámdi etip ázirlegen taǵamdaryn súısine jegenderin qaıta-qaıta aıtyp, alǵystaryn jaýdyrdy.
О́mir ESQALI,
«Egemen Qazaqstan».
Soltústik Qazaqstan oblysy.