Qazaq handyǵynyń 550 jyldyǵy merekelenetin ústimizdegi jylda jaryq kórip jatqan túrli baspa ónimderi qataryna taǵy bir kitap qosyldy. Almatydaǵy «Rýh BG» baspasynan jazýshy Beıbit Qoıshybaevtyń «Qazaq memleketi tarıhyna kózqaras» atty jumysy jaryqqa shyqty. (Qoıshybaev B. Qazaq memleketi tarıhyna kózqaras: tarıhı ocherk. – Almaty: Rýh BG, 2015. – 136 b.). Atalmysh tarıhı ocherkte qazaq memlekettiginiń handyq túrinde qurylýy, damýy, syrtqy jaýlardan qorǵanýy, odaqtas izdeýi, birtindep táýelsizdiginen aıyrylýy, otarlanýy jáne qaıta jańǵyrýy jaıynda jańasha áńgimelenip, alǵa tosyn paıymdar tartylady.
Ǵasyrlar boıy tarıh betterine túrli ataýmen iz qaldyryp kele jatqan memlekettiligin qazaq halqy XV ǵasyrdyń ortasynan óte bergende óz esimimen atalatyn derbes handyq mártebesindegi jańa sapaǵa aýystyrdy. Sóıtip, jańasha rásimdelgen, óz atymen aıshyqtalǵan memleketin tarıh sahnasyna shyǵardy. Oqyrman nazaryna usynylyp otyrǵan osynaý kitapta sol úderis áńgimelenip, Qazaq Ordasy tarıhyna tanymdy sholý jasalady. Handyqtyń negizi qalanǵan, irgesi keńeıtilgen, kórshiler dýshar etken basqynshylyq soǵystardan qorǵanǵan kezeńderi jaıynda áńgimelenedi. Ár kezgi tarıhı ahýal, eldegi ishki qaıshylyqtar, basqarýshy elıtanyń el múddesin kózdegen is-áreketteri, sondaı-aq memlekettik kózqaras turǵysynan órisi tar qadamdarǵa barýy jáne olarynyń tutastyqqa, birlikke tıgizgen teris áseri, sonyń saldarynan táýelsizdikti joǵaltý, jer-sýdyń, eldiń otarlanýy, aqyry, azattyqqa, shynaıy táýelsizdikke qol jetkizgen tar jol, taıǵaq keshýden ótý jaıynda sóz bolady.
El tarıhyn jazýda eýrosentrıstik kóne baǵdardan bas tartyp, jańa ádistememen qarýlanýdyń ózindik bir tájirıbesi osynaý «Qazaq memleketi tarıhyna kózqaras» kitabynda jasalǵan. Atalmysh tarıhı ocherk tarıhshylarǵa, zertteýshilerge, Otan tarıhyn súıetin barsha jurtshylyqqa jańasha paıymdalǵan túrli taǵylymdy aqparat usynýymen qundy.
Nurlybek DOSYBAI.