Aqtóbe oblysynyń ákimi Berdibek Saparbaev Reseı Federasııasynyń Oral qalasyndaǵy bas konsýly Saıd Zabıtovpen kezdesti. Qonaqty jylyshyraımen qarsy alǵan aýmaq basshysy Reseımen ózara qarym-qatynastyń anaǵurlym nyǵaıa túskenin, ásirese, shekaralas óńirlermen áleýmettik-ekonomıkalyq, mádenı jáne basqa salalarda ilgerileý bar ekenin atap ótti.
Bul óz kezeginde jalpy Qazaqstan – Reseı qarym-qatynasy damýynyń tıimdiligi men serpindiliginiń belgisi bolyp tabylady. Oblysta árbir úshinshi birlesken kásiporyn Reseı bıznesiniń qatysýymen qurylǵan. Aqtóbe óńirinde Reseı kásiporyndarynyń qatysýymen júzege asyrylyp jatqan iri jobalar qatarynda «Orys mys kompanııasy» JAQ, Aqtóbe rels arqalyqtary zaýyty jáne basqalary bar.
О́z kezeginde Saıd Zabıtov Reseı men Qazaqstannyń ǵasyrlar boıy qalyptasqan yntymaqtastyǵy budan bylaı da nyǵaıa beretinine senim bildir-
di. Sodan keıin bas konsýl Aýǵanstan soǵysyna qatysqan oblys turǵyny Artyq Elkeevke joǵary nagrada tapsyrdy. 1989 jyly KSRO Joǵarǵy Keńesi Tóralqasynyń Jarlyǵymen sol kezdegi Novoreseı aýdany «Qopa» keńsharynyń týmasy Artyq Elkeev «Qyzyl Juldyz» ordenimen marapattalǵan eken. Mine, arada 26 jyl ótkende nagrada ıesin tapty. Qazirgi tańda ekinshi toptaǵy múgedek Artyq Elkeev otbasymen oblys ortalyǵynda turady.
О́ńir basshysy da aýǵandyq jaýyngerdi laıyqty nagradasymen quttyqtap, oǵan myqty densaýlyq tiledi.
Satybaldy SÁÝIRBAI,
«Egemen Qazaqstan».
Aqtóbe oblysy.