Mańyzdy qujattar jobasy maquldandy

Keshe Astanada Táýelsiz Memleketter Dostastyǵyna múshe memleketterdiń Syrtqy ister mınıstrleri keńesiniń otyrysy ótti. Jıynda 22 másele kún tártibine shyǵarylyp, birqatar mańyzdy qujattardyń jobalary kelisildi. Alqaly jıyndy ashqan Qa­­zaq­stan Respýblıkasynyń Syrt­­qy ister mınıstri Erlan Ydy­­rysov Memleket basshysy Nur­sultan Nazarbaevtyń BUU-nyń minberinen sóılegen sóziniń mańyz­dylyǵyna keńinen toqtaldy. Qazirgi tańda álemdi tolǵandyryp otyrǵan kóptegen túıtkilderdi ońtaıly sheshýde Qazaqstan Prezıdentiniń talaıǵa oı salǵan usynystarynyń mańyzy zor. Ásirese, Elbasynyń BUU quzyretin jańasha qurýǵa, sondaı-aq, álemniń qaýipsizdigin qamtamasyz etýge qatysty pikir­leriniń jóni bólek. Jıyn barysynda TMD Atqarý komıtetiniń atqarýshy hatshysy Sergeı Lebedev Dostastyqqa múshe memleketterdiń ózara túsi­nis­tikpen jumys isteý maqsatynda kóptegen máselelerdi birlese talqylaýǵa múddelilik tanytyp kele jatqanyna nazar aýdardy. Budan bólek, ol: «TMD Syrtqy ister mınıstrleri keńesiniń kezek­ti otyrysyn ótkizý týraly sheshim qabyldandy. Ol jal­py ýaǵdalastyqqa sáıkes, 2016 jyl­dyń 8 sáýirinde Máskeýde ótedi», – dedi. О́z kezeginde TMD Aqparattyq keńesiniń basshysy, TASS agenttiginiń bas dırektory Sergeı Mıhaılov 2016 jyly TMD-nyń ishki týrızminiń tanymaldylyǵyn arttyrý qolǵa alynatynyn aıta kelip, «TMD memleketteriniń gý­ma­nıtarlyq yqpaldastyq qorynyń qoldaýymen aqparat agenttikteri óz kúshterimen ishki týrızmniń eń áleýetti baǵdarlary boıynsha jýrnalıster men fototilshilerge arnap press-týr ótkizedi», – dedi. Onyń aıtýynsha, bul maqsatta arnaıy saıt ashylady. Onda xalyq úshin eń kórikti týrıstik oryndar, tarıxı jáne qazirgi zamanǵy nysandar týraly qyzyqty materıaldar toptastyrylmaq. Basqosýda belgili bolǵandaı, TMD Lańkestikke qarsy kúres orta­ly­ǵynyń basshysy, polısııa general-polkovnıgi An­dreı Novıkov óz qyzmetin odan ári jalǵastyra beretin boldy. Naqtylaı aıtqanda, A. No­vı­kovtyń ókilettiligi 2018 jyl­dyń 31 jeltoqsanyna deıin uzar­tyldy. Alaıda, bul sheshim Syrt­qy ister mınıstrleriniń keńe­sinde qabyldanǵanymen, ol TMD Memleket basshylarynyń keńe­sinde arnaıy bekitilýi tıis. Aıta keteıik, polısııa general-polkovnıgi Andreı Novıkov TMD Lańkestikke qarsy kúres orta­ly­ǵyna 2006 jyldan beri jetekshilik etip keledi. Sonymen, otyrys qory­tyn­dysy boıynsha, syrtqy ister mınıstrleri BUU-nyń qury­lýy­nyń 70 jyldyǵyna baılanysty TMD memleket basshylary málimdemesiniń, sondaı-aq, halyq­aralyq lańkestikpen kúres týraly málimdemeniń, TMD memleket basshylarynyń Chernobyl AES-indegi apattyń oryn alýyna 30 jyl tolýyna qatysty úndeýi jobalaryn maquldady. Sonymen qatar, TMD-nyń 25 jyldyǵy qurmetine oraı, 2016-2017 jyldar aralyǵynda erekshe atalyp ótetin Is-sharalar jos­pary qabyldandy. Bul jospar boıynsha, Dostastyq elderi jastarynyń halyqaralyq strategııasyn júzege asyrý qolǵa alynbaq. Joldybaı BAZAR, «Egemen Qazaqstan».