Elshiler aqjaıyqta boldy. Aqjaıyq óńirine AQSh jáne Ulybrıtanııanyń Qazaqstandaǵy elshileri Rıchard Hoýgland pen Devıd Moran jumys saparymen kelip qaıtty. Olar óńirdiń saıası-ekonomıkalyq jáne áleýmettik jaı-kúıimen tanysty.
Batys Qazaqstan oblysynyń ákimi Baqtyqoja Izmuhambetovpen jáne “KPO” b.v kompanııasynyń bas dırektory Djýzeppe Pazımen kezdesip áńgimelesti. Olar issapar barysynda qaıtalanbas kelbeti men tarıhy, ómirsheń isteri men jobalary mol óńirdiń keleshegine den qoıdy. Memleketaralyq áriptestik pen halyqtar arasyndaǵy dostyqty nyǵaıtýǵa belsene úles qosyp júrgen qos elshi kezdesýler kezinde Qazaqstannyń álemdik saıasat sahnasyndaǵy aıshyqty ornyn aıryqsha atap kórsetti.
Temir QUSAIYN. Oral.
“Jol kartasy” partııalar nazarynda. Syr aımaǵyndaǵy saıası partııalarmen baılanys jónindegi konsýltatıvtik keńes qurylǵan bolatyn. Oblys ákiminiń orynbasary Murat Muhamedovtiń tóraǵalyq etýimen saıası partııalarmen baılanys jónindegi qoǵamdyq keńestiń kezekti otyrysy bolyp ótti. Onda Elbasy Joldaýynan týyndaǵan barlyq saıası partııalardyń eldiń damýy men ulttyq birliktiń tıimdi joldaryn biriktirýge baǵyttalǵan keńestiń erejesi bekitildi. Keńeste oblystyq jumyspen qamtýdy úılestirý jáne áleýmettik baǵdarlamalar bastyǵynyń mindetin atqarýshy B.Naqypov “Jol kartasy” baǵdarlamasy boıynsha aımaqta atqarylyp jatqan jumystar jaıyn baıan etti. Aǵymdaǵy jyly baǵdarlamany júzege asyrýǵa 6063,8 mln. teńge qarjy qaralǵan. “Jol kartasy” baǵdarlamasyna sáıkes partııa jetekshileri óz usynys-pikirlerin ortaǵa salyp, oı bólisti.
Erkin ÁBIL. Qyzylorda.
Kenshiler ımandylyq úıin salyp berdi. Kómirli Ekibastuzdyń jeri qazba baılyqqa toly aýyldarymen de belgili. О́tken aptada osyndaı aýyldardyń biri altyn men kúmis óndiretin ken orny bar Tórtqudyqta meshit ashyldy. Osy jerdegi taý-ken baıytý kombınatynyń basshylyǵy eki jyl buryn qurylysyn bastaǵan eken. Sátin salyp, aldaǵy Oraza aıyna oraı meshitti syıǵa tartty. Sóıtip, tórtqudyqtyqtardyń kópten kútken ótinishteri oryndaldy. Meshittiń ashylý rásimine oblys ákimi Baqytjan Saǵyntaev qatysty. О́ndiristi aýyldyń áleýmettik-rýhanı turmys jaǵdaılarynyń jaqsarýyna úles qosyp kele jatqan kenshilerge, kombınat basshylyǵyna alǵys aıtty. Kók kúmbezdi ásem meshit alystan kóz tartyp, aýylǵa sán berip tur. Endi úlkendermen qatar, aýyldyń jastary men balalar da ımandylyq jolyn qadir tutyp, kenshiler syılaǵan jańa meshitte bas qosatyn bolady.
Farıda BYQAI. Pavlodar.
Jumyssyzdar qataryn azaıtý úshin. Qazir ózdiginen jumys tabý qıyn ekeni jasyryn emes. Mamandyqtary boıynsha eńbekke qamtylýǵa úmittenýshi qaraǵandylyqtarǵa turaqty ótkizilip turatyn “Bos jumys oryndary men laýazymdardyń qalalyq jármeńkesi” óte qolaıly shara bolyp keledi. Oǵan osy joly kelýshiler ádettegideı az bolmady. Kásiporyndar men mekemeler tarapynan jarııa etilgen 1119 bos jumys ornyna ornalasýǵa talpynýshylardyń qujattary qaralyp, qalaǵan isterge beıimdilikteri men bilimderi baıqaldy. Jármeńke barysynda 120 adam jumysqa qabyldanýǵa joldama aldy. Al 300-den astamyna sondaı múmkindikke keńes berildi. Jyl basynan beri Qaraǵandy qalasy boıynsha 6880 azamattan eńbekke qamtylýǵa ótinish tússe, olardyń 5958-iniń tilegi qanaǵattandyryldy.
Aıqyn NESIPBAI. Qaraǵandy.
Jas jýrnalıster forýmy ótti. Semeıde “Istok” atalatyn qoǵamdyq birlestik bar. Osy birlestik “Qamqorlyq” dep atalǵan arnaıy baǵdarlamasy aıasynda múmkindigi shekteýli balalarǵa meılinshe qamqorlyq tanytyp keledi. Birlestik tipti jetkinshekterdiń týǵan kúnderin ótkizýge deıin atsalysýda. Qazirde birlestik múmkindigi shekteýli balalardyń jazǵy demalys lagerlerinde jaqsy demalýyna qolushyn berýde. Solardyń birqatary “Lesnaıa skazka” lagerinde demalyp qaıtty. Arasynda ıadrolyq synaqtardan zardap shekkender de bar. “Qamqorlyq” baǵdarlamasynyń aıasy ýaqyt ótken saıyn keńeıe túsýde.
Dáýlet SEISENULY. Semeı.
Áńgime arqaýy – dostyq. Dostyq úıinde jergilikti qolónershilerdiń kórmesi bolyp ótti. Ony Qazaqstan halqy oblystyq Assambleıasy men “Assambleıa” korporatıvtik qory uıymdastyrdy. Ulttyq qolóner salasynda tynbaı eńbek etip júrgen Vera Imashbaevanyń, Oleg Martynıýktiń, Elena Elızarovanyń týyndylaryn kópshilik qyzyǵa tamashalady. Al “forým-suhbat” barysynda “EQYU kópetnosty qoǵamdaǵy beıbitshilik pen kelisimdi qamtamasyz etedi”, “Ulttyq kásipti qoldaý jáne damytý etnosaralyq dostyq pen beıbitshilikke, toleranttylyqqa tárbıeleıdi”, “Qazaqstan halqy Assambleıasy: aldaǵy mindetter” degen taqyryptarda baıandamalar tyńdalyp, birligi jarasqan eldiń ómirinen jarqyn mysaldar keltirildi. Qoǵam turaqtylyǵy men etnosaralyq jarastyqty odan ári nyǵaıtý, ulttyq ónerge degen qurmet pen súıispenshilikti qalyptastyrý, jańa ınnovasııalyq múmkindikterdi paıdalaný máseleleri de áńgime arqaýyna aınaldy.
О́mir ESQALI. Soltústik Qazaqstan oblysy.