Bıylǵy jyly 16 qazanda Aqtóbe rels arqalyǵy zaýyty (ARAZ) alǵashqy otandyq rels ónimderi prokatyn shyǵardy. Bul biregeı kásiporyn – Memleket basshysynyń jeke tapsyrmasy boıynsha salynǵan TMD aýmaǵynda teńdesi joq zaýyt. О́tken jyldyń jeltoqsan aıynda Elbasy Nursultan Ábishuly Nazarbaevtyń qatysýymen bolǵan jalpy ulttyq telekópir aıasynda Aqtóbe rels arqalyǵy zaýytynyń birinshi kezegi iske qosylǵan bolatyn.
Zaýyt qurylysy men onyń óndiristik jelisi qysqa merzimde salyndy. Búgingi tańda kásiporyn daıyn ónimderdi shyǵarýdy bastady. Saltanatty is-sharaǵa «QTJ» UK» AQ prezıdenti A.Mamın, «Siemens S.p.a» kompanııasynyń bas dırektory Djýzeppe Ferrarıo, Investısııalar jáne damý mınıstri Áset Isekeshev, Aqtóbe oblysynyń ákimi Berdibek Saparbaev, Qyrǵyzstan Kólik jáne kommýnıkasııa mınıstri Arǵynbek Malabaev, «Ázerbaıjan temir joldary» JShS tóraǵasy Djavıd Gýrbanov qatysyp, sóz sóıledi. Sharaǵa qatysýshylar qatarynda Parlament depýtattary, TMD jáne Baltyq jaǵalaýy elderi temirjol ákimshilikteri men temirjol ónimderin shyǵaratyn kásiporyndardyń ókilderi boldy.
«Qazaqstan temir joly» UK» AQ prezıdenti A.Mamınniń aıtýynsha, Memleket basshysynyń ındýstrııalyq baǵdarlamaǵa saı tapsyrmasymen Qazaqstanda qysqa merzimde temirjol kóligin jasaýdyń jańa salasy qalyptasty. Álemdik jetekshi kompanııalar General Electric, Alstom,Talgo, Siemens qatysýymen júk jáne jolaýshylar teplovozdary, elektrovozdar, vagondar, iri vagon quımalary, ınfraqurylymdyq tehnıkalyq quraldar shyǵarylýda. Ol sondaı-aq, alǵashqy otandyq rels óniminiń Qazaqstannyń ındýstrııalyq tarıhynda mańyzdy oqıǵa ekendigine toqtaldy.
ARAZ-dyń jobalyq qýaty jylyna 430 myń tonna metall ónimderin jasaýǵa qaýqarly. Onyń shyǵaratyn negizgi ónimi – termoqysymǵa shydamdy R-65 markaly uzyndyǵy 120 metrge jetetin joǵary jyldamdyqty magıstralǵa arnalǵan relster. Oǵan qosa, jylyna 230 myń tonna rels arqaýlary, buryshtamalar, shvellerler jasalady. Bul temirjol ónimderi Qazaqstandy ǵana emes, kórshiles memleketterdiń de suranysyn qanaǵattandyrady.
Sondaı-aq, bul kúni Qazaqstandaǵy temirjol kóligi mashınasyn jasaý salasyndaǵy seriktestik pen bolashaǵyna arnalǵan dóńgelek ústel otyrysy da ótkizildi. Ondaǵy talqylaý barysynda qazaqstandyq «Tulpar-Talgo», «Elektrovoz qurastyrý zaýyty» (EQZ), «Lokomotıv qurastyrý zaýyty (LQZ) zaýyttaryndaǵy temirjol kóligi ónimderiniń tusaýkeser rásimi ótkizilip, ony «Qazaqstan Damý Banki» AQ-tyń qoldaýymen eksportqa shyǵarýdy júzege asyrýdyń máselesi saraptaldy. Dóńgelek ústelge qatysýshylardyń aıtýynsha, Eýrazııalyq aımaqtaǵy temirjol kóligi mashınalary ónimderin shyǵaratyn zaýyttar men qarjylyq ınstıtýttardyń arasynda tyǵyz qarym-qatynas ornaǵan. Qazaqstandyq eksportty qoldaý júıesi týraly «Qazaqstan Damý Banki» AQ basqarma tóraǵasy B.Jámishev baıandap, bank ARAZ qurylysyn qarjylandyryp qana qoımaı, endigi jerde onyń sheteldik tutynýshylarǵa ótkizý is-sharasyn da óz mindetterine alyp otyrǵandyǵyn málimdedi.
Al «Jınaq banki» AQ basqarma tóraǵasy A.Kamalov banktiń «QTJ» UK» AQ jobalaryn belsendi qoldap keledi. Bul óz kezeginde taýar aınalymynyń jaqsarýy men el ekonomıkasynyń serpindi damýyna yqpal etedi», dedi. Sonymen qatar, bank basshysy iri kólemdegi ınfraqurylymdyq jobalardyń ishinde ARAZ memleket pen jeke bıznes seriktestiginiń erekshe úlgisi ekendigine toqtaldy.
Dóńgelek ústel otyrysynda Ázerbaıjanǵa, Belorýssııaǵa, Grýzııaǵa, О́zbekstanǵa, Tájikstanǵa jáne Qyrǵyzstanǵa ARAZ daıyn ónimderin jetkizý jónindegi memorandýmǵa qol qoıyldy.
«Egemen-aqparat».