Temirtaýlyq avtobýs júrgizýshileriniń tústeriniń sýyqtyǵy sondaı, olar qabaqtaryn túıse boldy, qalanyń tóbesindegi qoıý tútin ydyrap, domna peshindegi balqyǵan shoıyn qaıtadan qatyp qalady. Iá, olardyń qabaqtary qatýly-aq. Bir qoly rýlde bolsa, ekinshi qoly judyryq bolyp túıilgen. Jolaqysyn tólemeseńiz – tóbeńizden túıip jiberý olar úshin túkke de turmaıtyn shyǵar. Túıip qana qoısa jaqsy-aý, jelkeńizden alyp avtobýstan laqtyryp jiberýi de bek múmkin...
Taıaýda ǵana bolǵan myna oqıǵadan soń osylaı demeske lajyń joq.
Qaladaǵy marshrýttardyń birine qatynaıtyn avtobýsqa mingen mektep oqýshysynyń – jap-jas balanyń jolaqy tóler kezde 10 teńgesi jetpeı qalypty. Oıyn balasy ǵoı, júgirip júrgeninde joǵaltyp aldy ma eken? Sodan, aıaldamasyna jetkende bala jylamsyrap, júrgizýshiden bir jolǵa rahym etip túsirýin suraıdy ǵoı. Alaıda, temirtaýlyq júrgizýshiniń qabaǵy tastaı túıilip, avtobýstyń esigin tars jaýyp alǵan. Ábúıir bolǵanda, jolaýshylar arasynan qaıyrymdy bir jan tabylyp, balanyń jetpeı qalǵan jolaqysyn tólepti. Sonda ǵana kóńili kóktemir júrgizýshi eki aıaldamadan ótip baryp, balany avtobýstan túsirgen...
Álgi balanyń anasy Vıktorııa Velmakınanyń aıtarǵa sózi joq. «Balanyń jylaǵanyna júrgizýshi túkirip qoıǵan ǵoı. Jetpeı qalǵan tıynyn tólep bergen qyzǵa basymyzdy ıip, alǵys aıtamyz. Men osy júrgizýshilerdi túsine almaımyn, haıýanǵa aınalyp bara ma? Áleýmettik jaǵynan az qamtylǵan otbasylardyń balalary bar. Endi kelip solardyń bárin kúnniń sýyǵyna qaramaı avtobýstan laqtyra berý kerek pe? Biz qaıda bara jatyrmyz, ózi?!», dep jazypty áleýmettik jelide ashynǵan ana.
Bir qyzyǵy, Temirtaýdaǵy avtobýs parkindegiler bul oqıǵadan habardar eken. Qazirgi ýaqytta máseleniń aq-qarasy anyqtalyp jatqanǵa uqsaıdy...
Qaırat ÁBILDINOV,
«Egemen Qazaqstan».
Qaraǵandy oblysy.