Tarazda Asfendııarov ýnıversıtetiniń fılıaly ashyldy

Bıylǵy jazda Jambyl oblysy turǵyndarynyń densaýlyǵyn jaqsartý jáne densaýlyq saq­taý júıesin medısınalyq kadr­larmen qamtamasyz etý maq­satynda Jambyl oblysynyń ákimdigi men S.Asfendııarov atyn­daǵy Qazaq ulttyq medı­sınalyq ýnıversıteti ózara yn­tymaqtastyq týraly ekijaq­ty memorandýmǵa qol qoıǵan bolatyn. Mine, sonyń arqasynda jaqynda Taraz qalasyndaǵy medısınalyq kolledji janynan S.Asfendııarov atyndaǵy Qazaq ulttyq medısınalyq ýnı­versıtetiniń fılıaly ashyldy. Yntymaqtastyq týraly bul ekijaqty memorandýmnyń ne­gizgi baǵyty – medısına qyz­metkerleriniń áleýetin jetildirý, áleýmettik medısınany damytý. Iаǵnı, Taraz qalasynda atalmysh ýnıversıtettiń fılıalyn asha otyryp, qashyqtyqtan oqytý men telemedısınany engizý, álemdik deńgeıdegi sheteldik ma­mandardy shaqyrý. Bastapqy medısınalyq-sanıtarlyq kómek deńgeıinde dıagnostıkalaý já­ne emdeýdiń jańa tehnologııalary men mamandandyrylǵan kómekti engizý. Sondaı-aq, 2015-2016 jyldar aralyǵynda Taraz qa­lasy men Jýaly aýdanynda me­dısınalyq jáne áleýmettik kómek kórsetýdi, Jambyl aýdany Qyzyltań aýylynda or­nalasqan «Aısha bıbi» shıpajaıy bazasynda ońaltý kómegin kórsetýdi damytý bolyp tabylady. Sondyqtan Jambyl oblysy ákimdiginiń qoldaýymen ashylyp otyrǵan ýnıversıtet fılıaly aımaqta rezıdentter daıyndaý jáne oqý ornynyń stýdentterin emdeý mekemelerinde ınternatýradan ótkizý, joǵary kýrs stý­dentterin daıyndaý jáne medısına mamandarynyń kásiptik biliktilikterin arttyrýmen aınalysady. Árıne, osydan keıin aımaqtyq fılıaldyń bazasynda ýnıversıtettiń professorlyq-oqytýshylyq quramy jumys istep, olar óz kezeginde tek oqý or­nynyń stýdentterin ǵana emes, emdeý-aldyn alý meke­me­leriniń qyzmetkerleriniń de bilik­tilikterin arttyrýmen aınalysatyn bolady. Sońǵy jyldary Jambyl oblysynyń medısına salasy damyp keledi. Bıyl Taraz qalasynda 300 oryndyq kóp­salaly aýrýhana, 200 oryndyq perınataldyq ortalyq, Baızaq aýdanynda 60 oryndyq týberkýlezge qarsy dıspanseri iske qosylmaq. Merki aýdany men Qarataý qalasynda 150 kelýshige arnalǵan emhanalardyń qurylys jumystary júrgizilip jatyr. Oralhan DÁÝIT, «Egemen Qazaqstan». Jambyl oblysy.