Keshe Ortalyq kommýnıkasııalar qyzmetinde Qazaqstan halqy Assambleıasynyń ókilderi brıfıng ótkizip, «Nur Otan» partııasy HVI seziniń sheshimderi boıynsha ózderiniń oılaryn ortaǵa saldy.
Brıfıngke QHA Tóraǵasynyń orynbasary Anatolıı Bashmakov, kompozıtor, QHA Keńesiniń múshesi Tólegen Muhamedjanov, Qarashaı-balqar etnomádenı birlestiginiń tóraıymy, QHA Keńesiniń múshesi Lıýdmıla Hochıeva jáne Pavlodar oblysyndaǵy QHA jastar birlestikteriniń úılestirýshisi Elına Paýlı qatysty.
Alǵashqy bolyp sóz alǵan A.Bashmakov sezdiń erekshe beles bolǵanyn atap ótti. Ondaǵy eń basty másele partııa atynan Prezıdent saılaýyna úmitker bolýǵa N.Nazarbaevtyń kelisimin bergeni boldy. Sonymen birge sezde Prezıdenttiń sóılep, bes halyqtyq reformalar týraly aıtqany Qazaqstan qoǵamynyń búgingi jáne aldaǵy ýaqyttaǵy ómiriniń basty baǵasy boldy dep sanaımyn, dedi. Odan ári A.Bashmakov Prezıdent jarııalaǵan reformalarǵa óz tarapynan túsinikter berip, olardyń mańyzdylyǵyn tyńdaýshylarǵa jetkizýge tyrysty. Sonyń ishinde qazaqstandyqtardyń bolashaqta birtutas ult bolatyndyǵyn jáne Máńgilik El ıdeıasyn iske asyrýda onyń mańyzy zor ekendigin aıtty. Osy arada 17 mıllıon qazaqstandyqtardyń myzǵymaıtyn bir ult ekendigi týraly óziniń bir aýyz óleńin de aıtyp berip, bul ıdeıanyń óziniń oıynan shyqqanyn jetkizdi. Sóziniń sońynda Assambleıa Tóraǵasynyń orynbasary sezde aıtylǵan N.Nazarbaevtyń baǵdarlamalyq sózderi bizdiń elimizdiń ekonomıkalyq, uıymdyq, fılosofııalyq qalyptasýyn anyqtap qana qoımaı, aldaǵy ýaqytta damýynyń negizgi baǵdary bolatynyn jetkizdi. Sonymen birge, ol barlyq qazaqstandyqtardy 26 sáýirde bir kisideı saılaýǵa qatysýǵa shaqyrdy.
О́ziniń sózinde kompozıtor Tólegen Muhamedjanov ta Elbasynyń «bolashaǵy birtutas ult» degen sóziniń mazmunyna tereń boılap, onyń mańyzdylyǵyn ashýǵa tyrysty. Bul birdeı quqy men múmkinshilikteri bar bir eldiń shekarasynda ómir súretin, bir taǵdyrly Qazaqstan halqy degen sóz. Sonymen qatar, ol Elbasynyń qazaq halqynyń moınyna báriniń uıystyrýshysy bolý týraly mańyzdy mindet júktelip otyr degen sózin de eske salyp ótti. Odan ári sheshen Qazaqstan halqy Assambleıasynyń atqaryp otyrǵan qyzmetterine, Qazaqstan halqynyń birligi men yntymaǵyn saqtaýdaǵy eńbegine joǵary baǵa berdi.
Sóz kezegi ózine tıgende L.Hochıeva Qazaqstanda turatyn barlyq etnostar da Prezıdenttiń sezdegi barlyq sózderine, ásirese, barlyq etnostyń da teń quqyly birtutas qazaqstandyq ult qataryna enetinine tánti bolǵanyna, onyń Qazaqstandy alǵa damytý baǵdaryn belgilegenine rıza bolǵandaryn jetkizdi.
Jastar atynan sóılegen E.Paýlı Prezıdent alǵa qoıyp otyrǵan mindetterdi iske asyrý jaýapkershiligi jastardyń moınyna túsip otyrǵanyn, bul isti jas azamattar Otan mindeti dep uǵynatynyna senim bildirdi.
Jaqsybaı SAMRAT,
«Egemen Qazaqstan».