ORAL. 13 naýryz. Batys Qazaqstan oblysy Bókeı ordasy aýdany Saraljyn aýyldyq okrýginiń ákimi Qýantaı Rashqalıev memlekettik qyzmet etıkasyna sáıkespeıtin teris is-áreket kórsetken. Bul týraly egemen.kz tilshisi habarlady.
Ákim bıylǵy jyldyń 5 aqpanynda aýyl ákimdigi ǵımaratynda azamatsha A.Bıǵalıevany balaǵattaǵan. Osyǵan baılanysty ol QR Ákimshilik quqyq buzýshylyq kodeksiniń tıisti baby men tarmaǵyna sáıkes aıypty dep tanyldy. Soǵan saı oǵan on aılyq eseptik kórsetkish kóleminde aıyppul salyndy. Buǵan qosa, Bókeı ordasy aýdany ákimi bergen minezdemede Q.Rashqalıevtiń eńbek tártibin saqtaı bermeıtini, jumys ýaqytynda ishimdik ishetini kórsetilgen. Mundaı teris qylyqtary úshin aýdan ákiminiń ókimimen ol qatań sógis túrindegi tártiptik jaýapkershilikke tartylǵan.
Osyny eskere kelip QR memlekettik qyzmet isteri jáne sybaılas jemqorlyqqa qarsy is-qımyl agenttigi Batys Qazaqstan oblysyndaǵy tártiptik keńesi óz otyrysynda ony Ar-namys kodeksi talaptaryna sáıkes qyzmetinen bosatý týraly usynys jasady.
Temir Qusaıyn.
Derek: egemen.kz.
Sýret: maxpark.com.