"Qazaqstan" sport saraıy

Astana. Muńaıtpasov kóshesi, 9-úı AZIADAǴA 178 KÚN QALDY Kelesi jyly Eýrazııa keńistiginiń keń tórinde qysqy Azııa oıyndary ja­laýyn kóteredi. Qazaq sporty ta­rıhynda máni men mańyzy jaǵynan ǵasyrǵa tatıtyn bul halyqaralyq deńgeıdegi jarys elimizde tuńǵysh ret ót­kizi­letini belgili. Sondyqtan da onyń azattyǵymyzdyń aq tańy qaıta araı­lap atqan kezden beri ózge elder­men terezesi teń bolyp, sońǵy 20 jyl­da álemniń 50 ozyq damyǵan el­deriniń qataryna enýge qabilettiligin arttyryp jatqan Qazaq eli úshin shyn máninde máni men mańyzy zor oqı­ǵa bolatyny sózsiz. Qazir qolda bar derekterge qaraǵanda, aldaǵy aq Azııa oıyndarynyń sporttyq jarystarymen birge onyń ashylý jáne jabylý saltanatyn sary qurlyqta buryn- sońdy bolmaǵan jaǵdaıda ótkizý úshin “2011 jylǵy VII qysqy Azııa oıyndaryn uıym­dastyrý komıtetiniń atqarýshy dıreksııasy” AQ jan-jaqty daıyndalyp, osynaý dúbirli dodaǵa arnalǵan elimizdiń qos qalasynda salynyp jatqan sport nysandaryn mer­zi­minde bitirýge basa nazar aýdaryp jatyr. Atalmysh dıreksııanyń baspasóz qyzmetiniń habarlaǵanyndaı, bul kúnderi qysqy oıyn­dar ótetin Astana jáne Almaty qalalary­nyń qurylys nysandary aıaqtalýǵa jaqyn qaldy. Sonyń ishinde Almatyda áıelder arasynda hokkeı jarysynan ótetin Balýan Sholaq atyndaǵy sport saraıynda júrgi­zil­gen kúrdeli jóndeý jumystary jaqynda El­basy Nursultan Nazarbaev kelip kórgen kez­de bitse, Astana qalasynda qysqy jarys­tar­dyń ashylý saltanaty bolatyn “Astana-Are­na” stadıony tolyǵymen tapsyrylyp qoı­yldy. Al basqa nysandarǵa kelsek, Asta­nada erler arasynda hokkeı matchtaryn ótkizý josparlanyp otyrǵan “Qazaqstan” sport saraıy, mánerlep syrǵanaý men short-trekke arnalǵan respýblıkalyq velotrek, konkıge beıimdelgen jabyq konkı tebý stadıonynyń qurylystary osy jyldyń so­ńyna qaraı tolyǵymen bitedi delinip otyr. Almatydaǵy qurylystyń jaǵdaıy da sha­mamen jeltoqsanda aıaqtalady delinýde. Osylardyń ishindegi qurylys boıynsha jaqynda biz “2011 jylǵy VII qysqy Azııa oıyndaryn uıymdastyrý komıtetiniń atqa­rýshy dıreksııasy” AQ mamandarymen birge “Qazaqstan” sport saraıyna barǵanymyzda onyń edenderi men esikterinen bastap, tó­beden muz aıdynyna jaryq beretin pro­jek­torlardyń bári túgel aýystyrylyp, oryn­dyqtar men kóptegen bólmelerdiń qaıta jabdyqtalyp jatqanyna, al onyń janynda salynyp jatqan qosymsha syrǵanaq kesheniniń qurylysynyń aıaqtalýǵa jaqyn qalǵanyna kóz jetkizdik. “Qazaqstan” sport saraıy – elimizdiń qys­qy sport túrlerine arnalǵan eń iri nysandarynyń biri bolsa da ol jaz shyǵyp, kúz kelgende sporttyń jazǵy túrlerinen de jarystar men basqa da mádenı sharalardy ótkizýge ábden laıyq sport ordasy bolyp sanalady. Sondyqtan ony elimizdiń ózge sport nysandaryna ese jibermeıtin eńseli ǵımarat desek te bolady. Bul nysan asta­nanyń Almatydan Aqmola qalasyna kóshi­rilgende qolǵa alynyp salyna bastaǵany belgili. Sóıtip, Prezıdent N.Nazarbaevtyń qoldaýymen turǵyzylǵan ol 2001 jyly paıdalanýǵa berildi. Osy ýaqyt ishinde sport saraıynda kóptegen halyqaralyq, respýb­lı­kalyq týrnırler men jarystar, chempıo­nattardyń neshe túrlisi bolyp ótkeni málim. Sonyń arqasynda ol Astananyń sport sa­lasyndaǵy naǵyz aınasyna aınalsa, al qazir onsyz elordada ótetin qysqy Azııa oıyn­da­ryn kózge elestete almaıtynymyz ras. Osy jerde sóz oraıy qysqy oıyndarǵa ke­lip turǵanda, bul kúnderi “Qazaqstan” sport saraıynyń oǵan jan-jaqty daıyn­da­lyp jatqanyn atap ótkenimiz jón. Sport nysanynyń bas dırektorynyń birinshi oryn­basary Qoshqarbaı Qosdáýletovtiń aı­týynsha, qysqy oıyndar ótkizý úshin qaıta jóndeý jumystary bastalǵan byltyrǵy jyldyń jeltoqsan aıynan beri biraz ju­mystar istelindi. Endi osy jumystardy 30 qa­zanǵa deıin bitirý josparlanýda. “Qazir sport saraıyn qaıta jóndeý jumystary júrgizilýde, – dedi ol bizben áńgimesinde. – Muz aıdynyn biz halyqaralyq talaptarǵa saı etip jasap, oǵan jaryq beretin pro­jek­torlardyń bárin oıyndardy tikeleı efır arqyly kórsetý úshin saılap qoıýymyz ke­rek. Qazir saraıda 140 projektor bolsa, onyń kóbisiniń jaryq berý qýaty álsiz. Sondyqtan aldaǵy kezde biz sodan eki ese az, biraq áleýeti kúshti ári sapaly projek­tor­lardy ornatyp, onyń jaryq berý qýa­tyn arnaıy komıssııaǵa tapsyrýdy jos­par­lap otyrmyz. Sonymen birge sport saraıy­nyń aǵash esikterin mindetti túrde joǵary standartqa aýystyryp, jankúıerler oty­ra­tyn jáne olardyń jaǵalaı júretin dáliz­derdi, baspaldaqtar men basqa da oryndarǵa jóndeý jumystaryn jasaýymyz kerek”. – Halyqaralyq talap boıynsha, – deıdi ol odan ári sózin jalǵap, – muz aıdyny bar sport saraıy bizdikindeı 4500 adamǵa emes, 5000, ári ketse 5500 adamǵa arnalyp saly­nýy kerek. Sonda ǵana ol halyqaralyq deń­geıdegi sport kesheni bola alady. Degenmen onyń pikirinshe, Astanaǵa jarysqa keletin hokkeı komandalarynyń bári muz aıdynynyń syrǵanaý koeffı­sıentin bas barmaqtarymen baǵalap ketedi eken. Munyń ózi 2001 jyly salynǵan sport saraıy aıdynynyń áli de bolsa syr bermeı kele jatqanyn bildirse kerek. Al atalmysh saraıdyń janynda jańadan saly­nyp jatqan qosymsha syrǵanaý keshenine keler bolsaq, onyń qurylysyn júrgizip jatqan “Shar-Qurylys” JShS-yndaǵy osy ny­sannyń jumysyna jaýapty bas ınjener Andreı Kovalenkonyń aıtýynsha, kompa­nııa­nyń ózinde 450 adam istese, osy jerdegi qurylyspen 250-den astam jumysshy aı­nalysýda. “Bizdiń kompanııa sport saraıy­nyń qosymsha syrǵanaý alańynyń qury­ly­syn júrgizilgen tender arqyly jeńip aldy, – dedi ol. – Bizben birge osy jumysty isteýge birneshe kompanııa da óz usynys­taryn bergen bolatyn. Alaıda, “Shar-Qu­rylys” JShS qaladaǵy eńseli ǵımarattar­dy, kógaldandyrý jumystaryn jasaýda bi­raz tájirıbesi bar kompanııa retinde báriniń kóńilinen shyǵyp, osy jumystyń qury­lysyna jiberildi. Qazir keshenniń negizgi bóligi 80 paıyzǵa, al syrtqy jumystary 95 paıyzǵa aıaqtaldy. Jumystyń bári merzi­­minen buryn jasalynyp jatyr”. Sonymen birge onyń aıtýynsha, sport kesheniniń syrt jaǵyn kógaldandyrý men abattandyrý jumystary osy aptada bastalyp, jaqyn ýaqytta bitse, odan keıin kópir janynan avtoturaq salynatyn bolady. Al ishki jumystarǵa kelsek, qazir keshen jaryq, sý, jeldetkish sııaqty eń birinshi kezekke kerek jabdyqtarmen qamtamasyz etilip otyr. Jalpy qosymsha syrǵanaý kesheninde bir trıbýna salynsa, onda 1500-den astam adam jarysty tamashalaı alatyn bolady. Osy­nyń bárimen 15-20 merdiger kompanııalar jumys isteýde. Dastan KENJALIN, Sýretterdi túsirgen  Orynbaı BALMURAT. JÚZ JOLDYQ JAŃALYQTAR * Hokkeıshiler Elbasy Kýbogyn sarapqa salady. Ústimizdegi jylǵy 10-14 tamyz aralyǵynda Astanadaǵy “Qazaqstan” sport saraıynda shaı­baly hokkeıden Qazaqstan Res­pýb­lıkasynyń Prezıdenti Nursultan Nazarbaevtyń Kýbogy úshin halyq­aralyq týrnır ótkiziledi. Oǵan Re­seı, Belarýs, Latvııa jáne Qazaq­stan syndy tórt eldiń bir-birden jasaqtary qatysady. Jankúıerler týrnırde Kontınentaldy hokkeı lıgasynda oınaıtyn juldyzdardyń ónerin tamashalaı alady. Bıyl tuń­ǵysh ret sóreden shyqqaly turǵan bul týrnır “Nur Otan” halyqtyq partııasy men Qazaqstan shaıbaly hokkeı federasııasynyń basta­ma­shy bolýymen uıymdastyrylyp otyr. Týrnırdiń kúntizbesine saı tó­mendegi komandalar mynadaı kún­deri ózara kezdesedi: 10 tamyz. 15.00. “Dınamo” (Rıga, Latvııa) – “Dı­na­mo” (Mınsk, Belarýs). 19.00. “Ba­rys” (Astana, Qazaqstan) – “At­lant” (Máskeý oblysy, Reseı). 11 tamyz. 15.00. “Atlant” – “Dınamo” Mn. 19.00. “Barys” – “Dınamo” R. 13 tamyz. 15.00. “Atlant” – “Dı­na­mo” R. 19.00. “Barys” – “Dınamo” Mn. 14 tamyz. 13.00. 3-4 oryndar úshin oıyn. 17.00. 1-2 oryndar úshin oıyn. * Qazaqstan boksshylary Brıta­­nııada jattyǵýǵa kiristi. Shildeniń aqyrǵy kúni elimizdiń eń tańdaýly bylǵary qolǵap sheberleri 10 kúndik oqý-jattyǵý jıynyn ótkizý úshin Brıtan aralyna attanyp ketti. Bizdiń qurama osy kúnderi munda sondaı-aq Anglııa, Kýba jáne Qy­taı jasaqtarymen matchtyq kez­de­sýler ótkizedi. Bul qurama koman­danyń Azııa oıyndary aldyndaǵy basty synaǵy bolmaq. Quramanyń bas jattyqtyrýshysy Myrzaǵalı Aıtjanov ózimen birge Birjan Ja­qypov (48), Mıras Jaqypov (51), Danııar Tólegenov (54), Mádı Sholaqov (57), Samat Báshenov (60), Danııar Eleýsinov (64), Serik Sápıev (69), Nurdáýlet Jarmanov (75), Almat Serımov (81), Vasılıı Levıt (91), Ivan Dychko (+91) esimdi boksshylardy áketti. * “Astana” Menshov pen Aroııa­ny alýǵa áreket jasap jatyr. Ko­manda qatarynan “Týr de Frans­tyń” úsh dúrkin jeńimpazy ıspan­dyq Alberto Kontadordyń ketetini belgili bolǵasyn klýb basshylyǵy onyń ornyn basatyn laıyqty velosıpedshilerdi tabýǵa shuǵyl qam jasady. Qazir olar “Výeltanyń” eki márte jeńimpazy, “Djıro” chem­pıony reseılik Denıs Menshovpen (Rabobank) jáne Caisse d Epargne lıderi Davıd Arroıomen kelissóz júrgizýde. Al osynyń aldynda horvat Robert Kıserloskımen kelisim-shart jasaldy. * Endigi qonaqtar – Oman fýtbolshylary. Qazaqstan quramasy ústimizdegi jylǵy 11 tamyz kúni Astanadaǵy jabyq stadıonda Oman komandasymen joldastyq kezdesý ótkizedi. Osyǵan oraı quramanyń bas jattyqtyrýshysy Bernd Shtork 3 tamyzda daıyndyqty bastaǵaly otyr. Ol shaqyrǵan 22 fýtbolshy Talǵardaǵy jattyǵý bazasyna jı­nalady. Osy jerden olar 9 tamyzda elordaǵa keledi. “Egemen-aqparat”.