Qaraǵandyda aýylsharýashylyq ushaqtary shyǵarylady
Oblys ortalyǵynyń irgesinde Jańaózen atty eldi meken bar. Osy jerde taıaýda shaǵyn avıasııalyq zaýyt qurylysynyń ornyna belgitas qoıý rásimi ótti. Bul óndiristi óńirdi údemeli ındýstrııalyq-ınnovasııalyq damytý baǵytyndaǵy mańyzdy jobalardyń biri sanalady. Elimizde tuńǵysh ret jeńil áýe kemelerin jasaıtyn bul kásiporyn kelesi jyly iske kirispek. Tolyq jobalyq qýatyna kóshken kezden bastap aýyl sharýashylyǵy salasyna arnalyp “Fermer-2” jáne “Fermer – 500” atalatyn 50 ushaq shyǵarylatyn bolady. Olar egistikti hımıkattarmen óńdeýge, tyńaıtqyshtar sebýge, dándi daqyl, kókónis, jaıylymdyq alqaptardy zertteýge qoldanylady. 2015 jylǵa deıin ushaqtar sany 500-ge jetkizilýge tıis.
Jobanyń bastamashysy “AK Navıgator” JShS bolsa, ony iske asyrýdy “QazAvıaSpektr” JShS moınyna júktegen. Alysqa tanymal atalǵan eki seriktestik alǵa qoıylǵan mindetti mejeli merzimde oryndap shyǵýǵa senimdi. Osy úshin aldyn-ala jasaqtalǵan tehnıkalyq jaraq, bilikti mamandar soǵan múmkindik beredi. Sonymen qatar ekeýine Qazan qalasyndaǵy “Fırma” MVEN” AAQ kómek kórsetedi. Ol ushaqtyń polımer materıaldaryn daıyndap berip otyrýǵa qatysady. Makedonııanyń “Mıkrosam” fırmasy da qajeti qural-jabdyqtardy qamtamasyz etedi.
Zaýyttyń ornyn belgileý rásimine qatysqan Qazaqstan Respýblıkasy Kólik jáne kommýnıkasııa mınıstri Ábilǵazy Qusaıynov atap ótkendeı, shaǵyn avıasııanyń keleshegi úlken. “Qazaqstan Respýblıkasynyń áýe keńistigin paıdalaný jáne azamattyq avıasııa qyzmeti týraly” qabyldanǵan Zań osy oraıda oǵan keń jol ashady. Al oblys ákimi Serik Ahmetov onyń jaı ǵana qurastyrý óndirisi emes, bastan-aıaq, ıaǵnı avıasııalyq- konstrýktorlyq bıýrodan bastap, ushaqty tolyq jasaıtyn kásiporyn bolǵaly turǵanyna nazar aýdartty. Túpki maqsat bul ushaqtardy kórshiles elderge eksportqa shyǵarý bolyp tabylady eken. Sondaı-aq aldaǵy ýaqytta kóp maqsatty “Suńqar” ushaǵyn jasaý da kózdelip otyr. Ony jol polısııasy, densaýlyq saqtaý, qorshaǵan ortany qorǵaý salasynyń qyzmetkerleri qoldana alady.
Iá, búginde ózgerister jyldam. Kúni keshe ǵana ózimizde ushaq jasaý qııaldaı kórinse oǵan da qol jetti mine.
Aıqyn NESIPBAI. QARAǴANDY.