Keshe Qazaqstan Respýblıkasynyń Memlekettik hatshysy – Syrtqy ister mınıstri Qanat Saýdabaev NATO Bas hatshysynyń Ortalyq Azııa jáne Kavkaz elderi boıynsha arnaıy ókili Robert Sımmonsty qabyldady, dep habarlady Syrtqy ister mınıstrliginiń baspasóz qyzmeti.
Taraptar Qazaqstan men NATO arasyndaǵy Áriptestiktiń derbes is-qımyldar jospary sheńberindegi qyzmettestikti damytý máselelerin, “Dala qyrany-2010” halyqaralyq bitimgerlik oqý-jattyǵýlar nátıjelerin, Aýǵanstan men Qyrǵyzstandaǵy jaǵdaıdy qosa alǵandaǵy óńirlik qaýipsizdik máselelerin talqylady.
Osy kúni Qanat Saýdabaev Jappaı qyryp-joıý qarýynan bas tartýdyń Búkildúnıejúzilik kúnine arnalǵan halyqaralyq konferensııa sheńberinde osy forýmǵa qatysýshylarmen birqatar kezdesýler ótkizdi.
BUU DB-nyń Shyǵys Eýropa, Baltyq jáne TMD elderi boıynsha óńirlik dırektory Korı Ýdovıchkımen kezdesýde Semeı óńirin damytýdyń birlesken josparyn júzege asyrýdaǵy Qazaqstan men BUU qyzmettestigine zor mańyz berildi.
BUU-nyń Ortalyq Azııadaǵy preventıvti dıplomatııa jónindegi óńirlik ortalyǵynyń basshysy Mıroslav Encha Qazaqstan jaǵyna forýmǵa qatysýǵa shaqyrǵany úshin rızalyǵyn bildirdi. Ol BUU Bas hatshysy Pan Gı Mýnnyń Jappaı qyryp-joıý qarýynan bas tartýdyń Búkildúnıejúzilik kúnine oraı Qazaqstan Prezıdenti N.Nazarbaev atyna joldaǵan quttyqtaýyn jetkizdi.
MAGATE-niń Bas dırektorynyń orynbasary Verner Býrkartpen kezdesý barysynda agenttiktiń bizdiń elimizde júzege asyryp jatqan birqatar birlesken jobalary týraly sóz boldy.