Jańa jyl qarsańynda elorda turǵyndary men qonaqtaryna, ásirese, jas astanalyqtarǵa umytylmas qýanysh syılap, muz qalashyǵyn turǵyzý dástúri bar. Biraq sońǵy jyldary Arqanyń aýa raıy kúrt jylynyp, bul dástúr keıingi birer jylda umytyla bastaǵan sııaqty. Bıyl Astana qalasynyń ákimdigi osy bastamany qaıta jandandyryp, elordanyń ártúrli aımaqtarynda tórt muz qalashyǵyn turǵyzýǵa sheshim qabyldady.
Alaıda, ıgi bastamaǵa taǵy da aýa raıynyń kúrt qubylýy qolbaılaý boldy. Jeltoqsanda qar erip, jańbyr jaýyp, jer sarqyraǵan sýǵa aınaldy. Soǵan qaramastan, muz qalashyǵyn turǵyzyp jatqan sheberler alǵan betterinen qaıtpady. Bul rette Astanada muz qalashyǵyn turǵyzý úshin Qytaıdan arnaıy shaqyrylǵan 70 sheberdiń ólermendigin erekshe atap ótken oryndy. Olar qarapaıym quraldarmen úı ornyndaı alyp muz kesekterinen neshe túrli ertegi músinderin jasap, olardyń sońǵy aptada Arqany býsandyryp jibergen jylymyqta erip ketpeýi úshin qoldan kelgenniń bárin jasady.
Eń úlken muz qalashyǵy «Han Shatyr» saýda ortalyǵynyń janynda boı kóterdi. Túrli-tústi muzdan jasalǵan sáýlet óneriniń nebir kóz tartar kórinisteri 2 myń sharshy metr aýmaqty alyp jatyr. Bıiktigi 25 metrdi quraıtyn elimizdiń jańajyldyq bas shyrshasy da osy muz qalashyǵynyń ortasynan oryn alǵan. Shyrsha túrli-tústi folga qaǵazdarymen oralǵan, sharlarmen bezendirilgen, túńgi ýaqytta san myń shamdary kóz jaýyn alyp, myń qubylady. Qalashyq turǵyzylǵan muz kesekteri arnaıy jabdyqpen óńdelip, kúrt erip ketý qaýpinen qorǵalady.
Astanadaǵy tórt muz qalashyǵyn turǵyzǵan sheberler 20 myń tekshe metr muz jáne 30 myń tekshe metr qardy paıdalanyp, neshe túrli ertegi keıipkerlerin turǵyzǵan. Úlken qalashyq aýmaǵynda muz aıdyny, muz tóbeshikteri, ertegiler men mýltfılmderdiń keıipkerleri, qardan turǵyzylǵan panno jáne basqa kóz tartar keremetter bar. Pannodan Astananyń aıtýly nysandaryn kórýge bolady. Sonymen birge, qala ákimdigi alańynda ornalasqan muz qalashyǵy da kórkimen kóz tartady. Qysqy qysqa merzimdi demalysqa shyqqan oqýshylar muz qalashyqtary aımaǵyn syńǵyrlaǵan kúlki men tolassyz shattyqqa toltyrýda.
Jylqybaı JAǴYPARULY,
«Egemen Qazaqstan».