Keshe Astanada tabıǵat tosyn minez tanytyp, jańbyr jaýdy. Arqanyń shyńyltyr aıazyna úırengen elordalyqtar qańtardyń qaq ortasynda jaýǵan jaýyndy tańsyq qubylys retinde qabyldaýda. Sebebi, ótken aptada ǵana bas qalada kún erekshe sýytyp, Selsıı baǵanasy boıynsha – 25-30 gradýs aıaz tirkelgen bolatyn.
Al keshe Astanada aýa temperatýrasy kúndiz +1 gradýs bolsa, keshke +3 gradýsqa deıin jylydy. Sonyń saldarynan aýanyń ylǵaldylyǵy 85 paıyzǵa deıin kóterildi. Mamandar aýa raıynyń bulaısha qubylýyn el aýmaǵynyń basym bóliginen atmosferalyq kóshkinderdiń ótýimen baılanystyryp otyr. Soǵan oraı, Astanadan bólek, birqatar óńirde de turaqsyz aýa raıy saqtalyp, kóp jerde jańbyr jaýdy. Al keı óńirlerde tuman túsip, kóktaıǵaq boldy.
Jalpy, aıazy aıaq-qoldy qaryp, bir orynda turǵyzbaıtyn Astananyń qysy sońǵy kezderi burynǵydaı qahar kórsete almaı keledi. Kópshilik muny jahandyq jylynýmen baılanystyryp, klımattyń ózgerisine boı úıretý kerektigin aıtýda. Qalaı desek te qańtarda jaýǵan jańbyr qala halqyn qýanta qoımady.
Ernar MUHAMBET.