«Aýyl» halyqtyq-demokratııalyq patrıottyq partııasynyń Parlament Májilisin taratý jáne Qazaqstan Parlamenti Májilisi
depýtattarynyń kezekten tys saılaýyn ótkizý týraly Jarlyqqa qatysty
MÁLIMDEMESI
Biz, «Aýyl» partııasynyń basshylary men músheleri, depýtattardyń Májilisti taratyp, Májilis jáne barlyq deńgeıdegi máslıhattar depýtattarynyń saılaýlaryn kezekten tys ótkizý týraly bastamasyna qatysty Memleket basshysynyń oń sheshim qabyldap, tıisti Jarlyqqa qol qoıǵanyn qýana quptap, qabyl aldyq. Búginde Qazaqstan astyq, dándi-daqyldar, sút, et ónimderiniń, balyq jáne basqa da azyq-túlik túrleriniń iri eksporttaýshysyna aınaldy. Desek te, jahandyq ekonomıkalyq daǵdarystyń jańa tolqyny qarsańynda biz óz bolashaǵymyzǵa, kúshimizge senimdi bolýymyz kerek. Sondyqtan elimizdiń aldynda Prezıdent usynǵan bes ınstıtýttyq reformany sátti júzege asyrý arqyly álemdik daǵdarystyń saldaryn jeńildetý mindeti tur. Májilis pen barlyq deńgeıdegi máslıhattar depýtattarynyń saılaýlaryn kezekten tys ótkizý arqyly biz halyq qalaýlysy bolýǵa eń laıyqty, bilikti, Qazaqstannyń naǵyz janashyr patrıottaryn irikteı alamyz. Sonymen qatar, bul – memleket qurylysynyń jańa kezeńinde jańadan jasaqtalǵan Parlamentte óz qarym-qabiletin kórsetý úshin ózge de partııalarǵa berilip otyrǵan zor múmkindik. Osy oraıda, aýyl jurtynyń, qarapaıym sharýalar men aýyl sharýashylyǵy taýarlaryn óndirýshi kásipkerlerdiń partııasy retinde biz Parlament depýtattarynyń der kezinde kótergen bastamasyn qoldaımyz jáne oǵan qatysty oń sheshim qabyldaǵan Elbasyna zor alǵysymyzdy bildiremiz.