Jambyl oblysynda jalpy quny 28,1 mlrd. teńgeni quraıtyn 16 memorandýmǵa qol qoıyldy. Jumysshylardyń eńbek quqyǵy men kepildigin qamtamasyz etý máselesine qatysty ótken jıynda Aýyl sharýashylyǵy mınıstrliginiń komıtet tóraǵasy, iri kásiporyndardyń basshylary men kásipodaq komıtetiniń tóraıymy jáne basqa da jumys berýshiler biraz máselelerdi talqylady.
Jumysshylardyń áleýmettik jáne eńbek quqyqtaryn qamtamasyz etý, jumys oryndaryn qysqartpaý joldary aıtyldy. Jıyn sońynda oblys ákimdigi, kásiporyn basshylary, kásipodaq komıteti jáne ulttyq kompanııalar ózara yntymaqtastyq týraly eki baǵyttaǵy birneshe memorandýmdarǵa qol qoıdy. Barlyǵy 16 memorandýmǵa qol qoıylsa, sonyń ishinde 6-ýy iri kásiporyndaǵy jumysshylardyń eńbek quqyqtaryn qamtamasyz etýge baılanysty. Atalǵan kásiporyndarda barlyǵy 20 myńnan astam jumysshy eńbek etedi. Al qalǵan 10 memorandým óndiris barysynda jergilikti jáne qazaqstandyq úlesti qamtamasyz etýge arnalǵan. Memorandýmdardyń jalpy quny shamamen 28,1 mlrd. teńge.
Sondaı-aq, óńirde jumysshylar men kásipodaqtar arasyndaǵy baılanysty nyǵaıtý, jumysshylardyń eńbek quqyqtaryn qamtamasyz etýge baılanysty kásiporynmen memorandýmǵa qol qoıý óz jalǵasyn tabatyn bolady.
Búgingi tańda Jambyl oblysynda 3952 kásiporyn bolsa, onyń 1721-men nemese 43,5 paıyzymen ujymdyq kelisimshart jasalǵan.
Oralhan DÁÝIT,
«Egemen Qazaqstan».
Jambyl oblysy.