Jyrlaryn,
Muqaǵalı,
Júregimmen,
Jatqa oqyp, jandaı súıgen ul edim men.
Kózime elesteıtin aqyn keıpi
Qol bulǵap turǵandaı bop jyr elinen.
Qarasaz, qara shalǵyn, qara óleńin,
Qarasý, qasıetti bar álemin
О́mirdiń órimine sanap edim,
О́leńniń órnegine balap edim.
Qumarttym jan syrynyń tazasyna,
Muń arttym nalasy men nazasyna.
Tabynyp qudiretteı qaraı bergem
Kúıdire tamyp ketken kóz jasyna.
Suqtanyp sulýlary kóz qadaǵan,
Sýlysaı bókterinde boz qaraǵan.
Sıqyry meni alystan arbaýshy edi
Syńǵyrlap saı-salasy saz daladan.
Kútkende kúpti júrek qarlyǵashyn,
Esirkep eskergende taǵdyrlasyn,
Kórgenmin Muqaǵalı mýzasynan
Meıir men mahabbattyń bar murasyn.
Táńirtaý bultyn emgen arly aqynym,
Shalkóde qutyn emgen arda qulyn.
Qunyǵyp óleńine kirgen saıyn
Jastaıdan bola bergen jan jaqynym.
Janymda jyr-kıeniń zarlyǵy bar,
Shaıyrdy bir kórýge boldym qumar.
Qudaıym saldy sátin,
Otyrdy aqyn
Júzinde, júreginde mol muńy bar.
Tilinen ý da, bal da tamyzatyn,
Dilinen óleń selin aǵyzatyn,
Shynyǵa sharap toly sýyq qarap,
Otyrdy qarsy aldymda naǵyz aqyn.
Men úshin osy sáttiń ystyǵy shyn:
Márt muzart, qyran qabaq, susty pishin.
О́tkir kóz, órshil jiger óńmenińnen
Oıyńnyń birdeı baqqan ishi-tysyn.
Jolyǵyp Qydyryma tańǵy armandaı,
Tilsizbin dýalanyp arbalǵandaı.
Qýanyp kúlimdeıdi júrek ishten
Pirime qolym berip jalǵanǵandaı.
Tóbemnen kózderiniń tónedi oty,
Qalmady qapyl jannyń záre-quty.
Jarqylyn janarynyń jylytpastan
Bir kezde dedi pirim: О́leń oqy!
Jyr toly dápterimdi joǵalttym men,
Jap-jańa jyrlar edi ǵajap kileń.
Jaqsy óleń oqymasań, eı, jas aqyn,
Betińe shasham myna sharapty men!
Men qaıbir oqýǵa óleń shappaı kermin,
Shoshynyp, ózimdi-ózim jasqaı berdim.
Oralǵan qapelimde til ushyna
О́ltirmes bir óleńdi bastaı berdim.
– Jamylyp saǵynyshtyń sal shekpenin,
Sarǵaıyp seniń úshin zar shekkemin.
Zaryqtyr, o, táńirim, jalyqtyrma,
Máńgilik ǵashyqpyn men, ant etkemin!..
...Oqylyp bitkende óleń, Pirim meni
Qushaqtap: «Ǵajap eken jyryń!» – dedi.
Júzine nur uıalap, meıirlenip,
Kózine kún uıalap kúlimdedi.
Betime sharap emes, jyryn shashty,
Jaıqalyp úlbiregen gúlin shashty.
Inige jany qalmaı elbiregen,
Aqtaryp tógip saldy yqylasty.
...Kóterdi saǵym jyldar ataq-atyn,
Saǵynam áli de sol shapaǵatyn.
Saǵynam saǵynyshyn uly jyrdyń,
Máńgilik Muqaǵalı mahabbatyn.
Qorǵanbek AMANJOL.
Astana.