Qazaqstanda uıaly baılanys qurylǵylaryn verıfıkasııalaý prosesin memlekettik kompanııaǵa berý josparlanyp otyr. Tıisti normatıvtik ózgerister qazirgi ýaqytta Májilis qaraýynda. Bul týraly Jasandy ıntellekt jáne sıfrlyq damý birinshi vıse-mınıstri Rostıslav Konıashkın málimdedi, dep habarlaıdy Egemen.kz.
Buǵan deıin smartfondardy tirkeý qyzmetin «ATS Mediafon KZ» jeke kompanııasy atqaryp kelgen bolatyn. Tipti 2025 jyldyń maýsym aıynda mınıstrlik bul naryqqa birneshe kommersııalyq uıymdy tartýdy josparlaǵan edi. Alaıda Úkimet deńgeıinde bul salany memlekettik monopolııaǵa ótkizý týraly sheshim qabyldandy.
Rostıslav Konıashkınniń aıtýynsha, bul qyzmetti memlekettik uıymnyń quzyryna berý máselesi jan-jaqty talqylanǵan.
«Normatıvtik ózgerister Májiliste qaralyp jatyr. Eger olar maquldansa, bul jumyspen memlekettik kompanııa aınalysady», dedi vıse-mınıstr Úkimette ótken brıfıngte.
Áskerde telefon qoldaný tártibi jeńildeıdi
2025 jyly mınıstrlik bul prosesti bızneske berýdi «utymdy» dep sanaǵan bolatyn. Ol kezde bıýdjet qarajatyn únemdeý jáne mehanızmdi jedel engizý maqsaty alǵa qoıylǵan edi. Biraq verıfıkasııa júıesi engizilgennen beri qazaqstandyqtar tarapynan kóptegen aryz-shaǵymdar tústi:
Shetelden ákelingen qurylǵylardy tirkeý kezindegi kedergiler; Ásirese Reseı, Qyrǵyzstan jáne О́zbekstannan kelgen smartfondardy verıfıkasııalaýdaǵy tehnıkalyq qıyndyqtar.Endi bul máseleler memlekettik baqylaý arqyly sheshiledi dep kútiledi. Zańnamalyq ózgerister qabyldanǵan jaǵdaıda, tirkeý prosesiniń ashyqtyǵy men sapasy memlekettiń tikeleı jaýapkershiliginde bolady.