Qazir jerdiń de, sýdyń da qojasy bar. Bul naryqtyń talaby. Munyń tıimdiligi sol, adamdar ózderine tıesili jerdiń de, sýdyń da paıdasyn kórýge daǵdylanýda.
Tipti buryn-sońdy aıtýdyń ózine júregiń shaılyǵatyndaı boı úırenbegen kásiptiń tizginin ustaý da túk bolmaı qaldy. «Kóz qorqaq, qol batyr» degendeı, táýekeliń tursa turmysyńdy túzeýge ábden bolady. Árıne, qur nartáýekelmen is bitpeıtini de belgili. Bul arada shyn kásippen aınalysamyn deýshilerge Úkimettiń ózi qoldaý kórsetýi qaıtarymdy bola túskenin ańǵaramyz.
Hromtaý aýdanynyń «Tulpar» aksıonerlik qoǵamyna qaraıtyn Tabantal balyq sharýashylyǵynyń basshysy Myqtybek Esmaǵambetov toǵanda balyq ósirýdi osydan 13 jyl buryn bastapty. Maǵadjan sý qoımasyn senimdi basqarýǵa alǵan kásipker bastapqy jyldary toǵandaǵy tabıǵı ósip-óngen balyqtardyń kóbeıýine baǵyttalǵan jumystardy atqardy. Áıteýir kóńilge demeý demeseń, bul qarqynmen toǵannyń paıda ákelip jarytpasyn ańǵarǵan ol memlekettik baǵdarlama boıynsha nesıe alyp, jańa tyń istiń tigisin tarqatýǵa kiristi. Ony toǵandaǵy balyq qoryn molaıtý, ondaǵy balyqtyń sapasyn jaqsartý týraly oı mazalaı berdi. 2007 jyly toǵanǵa Qostanaı oblysy aýmaǵynan, Tobyl ózeniniń joǵarǵy basynan 50 myń tuqynyń shabaǵyn jiberedi.
Satybaldy SÁÝIRBAI,
«Egemen Qazaqstan».