Zerendi aýdanyndaǵy «Vıktorovka» JShS únemshildik qozǵalysyn óristetýde. Máselen, sharýashylyq Polshadan satyp alynǵan bý qazandyǵy arqyly shyǵyn kólemin edáýir azaıtyp, qorshaǵan ortanyń tazalyǵyn qamtamasyz etýde.
Bul qazandyqtyń ózindik ereksheligin atap kórsetkimiz keledi. Ony qoldaný qarapaıym ári tıimdi bolyp shyqty. Keńse, tehnıka turaqtaryna, mashına-traktor sheberhanasy men áleýmettik nysandarǵa jylý beretin bý qazandyǵynda kómirdiń ornyna zyǵyr sabany jaǵylady. Sabandy jaǵý úshin tamyzyqtyń da qajeti joq. Sireńke tutatsań boldy, lap ete qalady. Qaqpaǵy jabylǵannan soń peshtegi orama 2 saǵat boıy shoqtanyp jatady. Aıazdy kúnderi táýligine 12 zyǵyr oramasy jaǵylsa, 20 gradýsqa deıingi sýyq kúnderi 8 orama jetip jatyr.
– Syıymdylyǵy 25 tekshe metr qazandyqtaǵy sý áýeli qaınatylady, – deıdi JShS dırektory Vıktor Andrıýhın. – Ol arnaıy sorǵysh arqyly jylý júıesine jiberiledi. Qyzý mólsheri kompıýter arqyly rettelip otyrady. Burynǵy bý qazandyǵynda táýligine quny 30 myń teńgege baǵalanǵan 2-3 tonna kómir jaǵylatyn. Al, zyǵyr sabanynyń bir oramasyna jumsalatyn shyǵyn 900 teńgeni quraıdy. Qarapaıym esepke júginsek, qazir táýligine 9 myń teńgege baǵalanǵan zyǵyr oramalary jaǵylady. Iаǵnı, burynǵy jyldary jumsalatyn qarjynyń 60-70 paıyzy únemdelýde. Biz kópten beri maıly daqyldardy ósirýmen aınalysamyz. Zyǵyrdyń sabany Vıktorovka men Krasılovka selolarynyń irgesinde molynan maıalanǵan.
Baqbergen AMALBEK,
«Egemen Qazaqstan».
Aqmola oblysy,
Zerendi aýdany.