Saıası naýqanǵa «Birlik» partııasy da qosyldy

Qazaqstan Respýblıkasy Ortalyq saılaý komıssııasynyń keshegi otyrysynda OSK «Birlik» saıası partııasynyń partııalyq tizimin tirkedi. Qaýly jobasymen Komıssııanyń hatshysy Baqyt Meldeshov tanystyrdy. «Sizderdiń nazarlaryńyzǵa «Birlik» saıası partııasynyń par­tııalyq tizimin tirkeý týraly qaýly jobasy usynylyp otyr. Qujat boıynsha «Birlik» saıası partııasynyń partııalyq tizimi tir­keledi. Tirkelgen Parlament Má­jilisiniń depýtattyǵyna kandı­dat­tarǵa kýálik beriledi. Kandı­dattardyń sany – 8», – dedi Baqyt Meldeshov. Onyń habardar etkenindeı, partııalyq tizimge engizilgen azamattardyń QR-nyń «Saılaý týraly» zańnamasyna sáıkestigi elimizdiń Ishki ister mınıstrligi men Bas prokýratýrasy arqyly tekserilgen. Atalǵan vedomstvolar bergen aqparattarǵa sáıkes, partııalyq tizimdegi azamattardyń barlyǵynyń da zańǵa sáıkestigi anyqtalǵan. Kandıdattardyń jáne olardyń jubaılarynyń tabysy jáne múlki týraly deklarasııalary salyq organdarynyń anyqtamalarymen rastalǵan. OSK músheleri qaýly jobasyn biraýyzdan maquldady jáne «Birlik» saıası partııasynyń ataýy daýys berý bıýlletenine engi­ziletin bolyp sheshim qabyldandy. Budan soń Ortsaılaýkom basshysy Qýandyq Turǵanqulov OSK-nyń otyrysyna qatysqan «Birlik» saıası partııasy tóraǵasynyń orynbasarlary T. Qýanyshevqa jáne B. Baıqadamovqa Qazaqstan Res­pýblıkasy Parlamenti Má­jilisiniń depýtattyǵyna kandı­dattardyń kýálikterin tap­syrdy, sondaı-aq, «Birlik» partııa­synyń par­tııa­lyq tizimine engizil­gen Máji­lis depýtattyǵyna bar­lyq kandı­dattardyń kýálik­terin berdi. Atap óteıik, 2016 jylǵy 12 aqpandaǵy jaǵdaı boıynsha Ort­saılaýkomǵa usynylǵan 6 par­tııalyq tizimniń barlyǵy tirkeldi. Olar – «Nur Otan» partııasynyń, «Aq jol» QDP-nyń, «Aýyl» HDPP-nyń, QKHP-nyń, JSDP-nyń já­ne «Birlik» SP-nyń partııa­lyq tizimderi. Ortalyq saılaý komıs­sııa­synyń keshegi otyrysynda, sondaı-aq, «2016 jylǵy 20 naý­ryz­ǵa taǵaıyndalǵan Qazaqstan Res­pýblıkasy Parlamenti Májilisi depýtattarynyń kezekten tys saılaýyna jáne máslıhat depý­tat­tarynyń kezekti saılaýy­na halyqaralyq uıymnyń baı­qaý­shylaryn akkredıtteý týraly» qaýly da qabyldandy. OSK múshesi Tatıana Ohlopkovanyń aıtýynsha, atalǵan qaýlyǵa sáıkes Qazaqstan Respýblıkasy Ortalyq saılaý komıssııasy janynan Qazaqstan Respýblıkasy Syrtqy ister mınıstrliginiń usynýy boıynsha EQYU/DIAQB mıssııasynyń alǵashqy 12 baıqaýshysy akkredıttelgen. Sonymen qatar, «Saılaý týraly» Zańnyń 12-babyna jáne 19-babynyń 8-tarmaǵyna sáıkes Ortsaılaýkom zańnamada belgilengen táprtippen saılanǵanǵa deıin Jambyl oblystyq saılaý komıssııasynyń shyǵyp qalǵan múshesiniń ornyna S.Mádıevany taǵaıyndady. Álısultan QULANBAI, «Egemen Qazaqstan». Sýretti túsirgen Erlan OMAROV.