Kandıdattar arasynda ózin ózi usynǵandar basym

Keshe Ortalyq saılaý komıssııasynda Qazaqstan Respýblıkasy Parlamenti Májilisiniń jáne máslıhattarynyń depýtattaryn saılaý jónindegi saılaý naýqanynyń barysy týraly QR OSK múshesi M.Sársembaev brıfıng ótkizdi. Aldymen ol partııalyq tizimder boıynsha saılanatyn Parlament Májilisiniń depýtattyǵyna kandıdattardy usyný barysyna toqtaldy. Onyń atap ótýinshe, Ortalyq saılaý komıssııasyna alty partııalyq tizim usynylǵan. Qazirgi ýaqytta olardyń beseýin Ortsaılaýkom tirkedi. Partııalyq tizimderdi tirkeý 19 aqpanǵa deıin júrgiziledi. OSK múshesi budan keıin barlyq deńgeıdegi máslıhattar saılaýynyń jaıy týraly aıtyp berdi. «2016 jylǵy 20 naýryzda barlyq deńgeıdegi máslıhattardyń 3335 depýtaty, sonyń ishinde oblystyq, Astana jáne Almaty qalalary máslıhattarynyń 550 depýtaty, aýdandyq máslıhattardyń 2160 jáne qalalyq máslıhattardyń 625 depýtaty saılanady, – dedi M.Sársembaev osy jóninde. – Máslıhattar depýtattyǵyna kandıdattardy usyný belsendi ótýde. Oblystyq, Astana jáne Al­maty qalalarynyń aýmaqtyq saı­laý komıssııalarynyń usyn­ǵan málimetteri boıynsha barlyq deńgeıdegi máslıhattar depýtat­tyǵyna 7885 kandıdat usynyldy». M.Sársembaevtyń habardar etýinshe, olardyń 866-sy – ob­lystyq máslıhattarǵa, 34-i – As­tana qalalyq máslıhatyna, 133-i – Almaty qalalyq máslıhatyna usynylyp otyr. Aýdandyq máslıhattarǵa 5403 kandıdat, qalalyq máslıhattarǵa usynylǵan kandıdattardyń sany qazirge 1449 adam eken. Bir depýtattyq man­datqa ortasha básekelestik qazir­gi kezdiń ózinde ekiden astam adamdy quraıdy. Saıası partııa­lar 1942 adam (24,6 %), qoǵam­dyq birlestikter 12 adam (0,2 %), al 5931 adam (75,2 %) ózin-ózi usyn­ǵandar. Usynylǵan kandıdat­tardyń ishinde 40 ulttyń ókili bar. Kan­dıdattardyń 71,4 paıyzy – er adam­dar, 28,6 paıyzy – áıelder. Son­daı-aq, olardyń 72,3 paıyzy joǵary bilimdi, ortasha jasy – 43 jas. «Usynylǵan kandıdattardyń ishinde ákimdikter men máslıhattar qyzmetkerleri – 255 adam (3,2%), memlekettik kásiporyndar, mekemeler jáne uıymdar qyzmetkerleri – 3653 adam (46,3%), kommersııalyq qurylymdardyń qyzmetkerleri – 3384 adam (42,9%), saıası partııa­lar men ÚEU-nyń ókilderi – 135 adam (1,7%), zeınetkerler – 60 adam (0,8%), jumyssyzdar – 202 adam (2,6%), 5 adam (0,1%) jumys ornyn kórsetpegen. Okrýgtik saılaý komıssııalary máslıhattar depýtattyǵyna 1096 kandıdatty tirkedi», – dep qorytty sózin M.Sársembaev. Álısultan QULANBAI, «Egemen Qazaqstan».