Reseıdiń Iаkýtııa Respýblıkasyndaǵy Mırnyı aýdanynan quny 100 mıllıon rýblge baǵalanatyn iri kólemdegi almas tabyldy. Ol «Iýbıleınaıa» dep atalatyn trýbka arqyly óndirildi. Krıstall №14 Aıhal ken baıytý kombınaty aýmaǵynan alyndy.
Aqshyl sary tústi bul iri laǵyl tastyń taza salmaǵy 121,96 karat tartady. Ol 31,28 h 30,00 h 28,57 mm kólemdi oktaedr pishiminde bolyp shyqty. Almastyń zergerlik turǵydaǵy sapasy «2 Black Sawables 3 colour» belgisine ıe. Ol barynsha móldir, sarǵysh beldeýli, perıferııalyq aımaqtaryna azdaǵan olıvın men grafıt-sýlfıd qosylǵan.
Sarapshylar krıstaldyń baǵasyn 1,5 mıllıon dollarǵa baǵalap otyr. Ony tapqan «Iýbıleınaıa» trýbkasy burynnan osyndaı iri kólemdi asyl tastarǵa kezigip turatyndyǵymen tanymal. Ol 2015 jyly bul jerden salmaǵy 50-den 138 karatqa deıin baratyn birneshe krıstaldy tapqan bolatyn. Olardyń arasyndaǵy massasy 76,07 karattyq almasqa «Uly Otan soǵysyndaǵy Jeńiske – 70 jyl» degen ataý berildi. Al aýqymy 64,73 karat tartqan kelesi almas «Angola Respýblıkasy táýelsizdigine 40 jyl» degen ataýmen tarıhta qaldyryldy.
Damır QOJAMQUL.