ALMATY. 17 aqpan. Almatyda Prezıdent muraǵatynda Ulttyq ǵylym akademııasynyń qurylǵanyna 70 jyl tolýyna oraı «Eldiń ıntellektýaldy kapıtaly: Táýelsiz Qazaqstannyń zoologııa ǵylymy» atty tarıhı-qujattyq kórme jáne dóńgelek ústel ótti. Bul týraly egemen.kz tilshisi habarlady.
Tarıhı-qujattyq kórme Bilim jáne ǵylym mınıstrligi ǵylym komıteti zoologııa ınstıtýty, Ǵylymı tehnıkalyq qujattama ortalyq memlekettik muraǵatymen (QR ǴTQ OMM), «Ǵylym Ordasy» respýblıkalyq memlekettik kásiporyn vedomstvolyq muraǵatymen birlestikte daıyndaldy.
Zııatkerlik kórmede Qazaqstannyń zoologııa ǵylymynyń tarıhyn, onyń qalyptasýy jáne damýyn beıneleıtin muraǵat qujattary: zoologııa sektorynyń qurylýy týraly hattamalar men qaýlylar, basshylardy taǵaıyndaý týraly hattamalardan úzindiler, ǵylymı-zertteý jumystarynyń josparlary men esepteri, jarııalanǵan eńbekter týraly málimetter, ınstıtýttyń zertteý qyzmeti men halyqaralyq qatynastary boıynsha hat almasý usynyldy. Kórmede sırek kezdesetin, qyzyl kitapqa engen jándikterdiń zoologııalyq kolleksııalary, zoologııa ınstıtýtynyń eńbekteri ornalastyryldy.
Kórmeniń saltanatty ashylýynda Prezıdent muraǵatynyń dırektory Borıs Japarov, Ulttyq ǵylym akademııasynyń prezıdenti Murat Jurynov, Ǵylymı tehnıkalyq qujattama ortalyq memlekettik muraǵatynyń dırektory Gúlaıhan Sársenova sóz sóıledi.
Dóńgelek ústel sheńberinde Pavel Marıkovskııdiń Prezıdent muraǵatynyń qorynda saqtaýdaǵy qoljazbasynyń negizinde daıyndalǵan «Vospomınanııa natýralısta, zoologa, pısatelıa» kitabynyń tusaýkeseri ótti. Tusaýkeser QR ǴTQ OMM-da saqtaýdaǵy Pavel Marıkovskııdiń jeke qorynyń materıaldary negizinde daıyndalǵan kórmemen qosa ótkizildi.
Aınash Esalı.
Derek, sýret: egemen.kz.