AQTО́BE. 23 aqpan. Aqtóbe qalasyndaǵy «Mádenıet» saýda úıindegi «Altyn adam» kıimderi satylatyn oryn ashyldy. Otandyq ónimder ilingen býtıktiń saltanatty ashylý saltanatynda qala ákimi Bekbol Saǵyn men oblystyq kásipkerler palatasynyń dırektory Nurlybek Muqanov lenta qııý rásimin jasap, sórelerdegi taýarlardy kórip shyqty. Bul týraly egemen.kz tilshisi habarlady.
Qazaqstandyq dızaıner Aıjanı Nurlanova qala ákimine otandyq ónimderdi tanystyryp, Astanadan Aqtóbege qatynaý qıyn bolǵandyqtan, ónimniń jańa úlgisin emes, burynǵy úlgilerin ákelýge týra kelgenin, aldaǵy ýaqytta taýarlardyń túrleri tolyqtyrylatynyn aıtty. Otandyq ónimderdiń baǵasy kim-kimge de qoljetimdi bolmaq. Er-azamattarǵa arnalǵan kostıým-shalbarlar 30-60 myń teńge shamasynda.
Saýda ornynda «Altyn adam» otandyq brendiniń kostıým-shalbarlarynan basqa, er-azamattardyń kóılekteri, sondaı-aq, Qaraǵandyda daıyndalǵan aıaq kıimder satylýda. Ázirge saýda ornynda úsh adam jumys isteıdi. Eger aqtóbelikter tarapynan otandyq ónimge degen suranys joǵary bolyp jatsa, bolashaqta oblys ortalyǵynan «Altyn adam» fabrıkasy óndirgen ónimder satylatyn jeke dúken ashý oılastyrylýda.
«Altyn adam» fabrıkasynyń ókilderi Aqtóbede saýda ornyn ashyp qana qoımaı, qaladaǵy birqatar oqý oryndaryndaǵy dızaıner mamandyǵy boıynsha bilim alyp jatqan stýdentterge, sondaı-aq, kásip ashýǵa nıetti adamdarǵa arnaı dáris oqyp, bıznes-koýchıng uıymdastyrýdy da qarastyrýda.
Satybaldy Sáýirbaı.
Derek, sýret: egemen.kz.