Úmitkermen demalys kúngi únqatysý

Partııanyń Almatydaǵy qoǵamdyq qabyldaý bólmesinde saılaýshylar Jalpyulttyq sosıal-demokratııalyq partııanyń atynan Qazaqstan Respýblıkasy Parlamenti Májilisiniń depýtattyǵyna kandıdat Tazabek Sámbetbaımen kezdesti. Áýeli kezdesýge kelgenderge Jal­pyulttyq sosıal-demokra­tııa­lyq par­tııanyń saılaýaldy baǵdar­la­ma­syndaǵy basymdyqtar túsindirildi. Onyń ishinde Qazaqstanda jańa zamanǵa saı álemde qalyptasqan ómir súrýdiń úzdik standarttaryn engizý, óndiris áleýetin arttyryp, ınnovasııalyq ekonomıkaǵa jol ashý sııaqty qazirgi zamanǵa qajetti máseleler qamtylǵany kóldeneń tartyldy. Olar jınalys ústinde úmitkerdi su­raq­tyń astyna aldy. О́z kezeginde úmit­ker suraqtarǵa hal-qaderinshe jaýap qaıtardy. Qalanyń jańadan qurylǵan Naý­ryz­baı aýdanynan jetken turǵyndar óz­­deriniń oılaryndaǵy kókeıkesti degen máselelerin ortaǵa saldy. Par­la­ment depýtattyǵyna kandıdattan jer­gilikti ákimshilik kedergilerdiń oń sheshilýine yqpal jasaýyn surady. Jańa­dan qurylǵan ákimshilik aýmaǵynyń «Shuǵyla» shaǵyn aýdanynda jer daýy kórinis berip qalyp turǵan syńaıly. Jergilikti sheneýnikter tez-aq arada op-ońaı sheshiletin turmystyq máseleni sózbuıdalyqqa salyp, bıýrokrattyq minez kórsetip otyrǵan kórinedi. Almaty qalasynyń Naýryzbaı aý­danynan kelgen saılaýshynyń sózi­ne muqııat qulaq túrgen kandıdat Ta­zabek Sámbetbaı bul ótinishti aıaqsyz qaldyrmaýǵa ýáde etti. Partııa belsen­dileri jergilikti ákimdikpen birlesip, atalǵan máseleniń anyq-qanyǵyna kóz jetkizetinin, múmkindigi bolǵansha isti oń sheship beretindigin aıtyp, saılaýshyny sendirdi. – Turǵyndar osyǵan uqsas áleý­mettik-turmystyq máselelerdi kóterip bizge buryn da keletin, aldaǵy saıası naý­qan – saılaýǵa baılanysty taǵy da tóbe kórsete bastady, – deıdi Parlament Má­jilisi depýtattyǵyna kandıdat, Jal­pyulttyq sosıal-demokratııalyq partııa Almaty fılıalynyń jetekshisi Tazabek Sámbetbaı. – Biz óz tarapymyzdan birde-bir kelýshiniń aıtqandaryn nazardan tys qaldyrmaýǵa tyrysamyz. О́ıtkeni, biz ózimiz sol halyqtyń bir múshesimiz. Qandaı da bir máseleniń baıybyna baryp, mazmunyn ashý úshin aldymen partııanyń bilikti zańgerlerin iske jumyldyramyz. Qoǵamdyq qabyldaý úıine osy kúni kandıdat Tazabek Sámbetbaımen kezdesýge kelgen almatylyq qurylysshynyń da máselesi jarııaly túrde qaraldy. Qurylys kompanııasy qol astynda qyzmet etken jumysshynyń jalaqysyn 6 aı boıy bermegen bolyp shyqty. Osy­ǵan baılanysty kandıdattyń tapsyrýy­men qoǵamdyq qabyldaý bólmesinde zań­dyq kúshi bar tıisti qujattar ázirlendi. Talǵat SÚIINBAI, «Egemen Qazaqstan». ALMATY.