QOSTANAI. 1 naýryz. Kóktemniń alǵashqy kúni Qostanaı qalasy ortalyǵyndaǵy Dostyq úıinde elimizde tuńǵysh ret merekelenip otyrǵan Alǵys aıtý kúni atalyp ótti. Bul týraly egemen.kz tilshisi habarlady.
Negizi Qostanaıda Alǵys aıtý kúni kóptegen sharalar ótkizildi. Barlyǵy da meıirimdilikke, dostyq taqyrybyna arnaldy. Mektepterde, balabaqshalarda, joǵary, arnaıy kásiptik oqý oryndarynda, kitaphanalarda qyzyqty sharalar, kórmeler ótti. Al Dostyq úıine jastar, zııaly qaýym ókilderi, Qazaqstan halqy oblystyq assambleıasynyń músheleri jınaldy. Aldymen merekege kelýshiler Dostyq úıiniń ekinshi qabatynda Qostanaı oblysynda turyp jatqan túrli ulystardyń ulttyq kórmesin tamashalady. Sodan keıin elimizde tuńǵysh toılanǵan merekeniń saltanatty ashylýy boldy.
Oblys ákimi Arhımed Muhambetov jınalǵandarǵa merekeniń halqymyz birligi úshin aıyryqsha mańyzy barlyǵyn atap ótti. Oblys kóleminde turyp jatqan barlyq ulttar men ulystar bir maqsatqa ǵana umtylatynyn, elimizdiń damýy men tynyshtyǵyn tileıtinin aıtty. Munan keıin Qostanaı óńirindegi basqa ulystar ókilderi sóz aldy. Olardyń barlyǵynyń lebizinen «Qazaq eli degenshe qaıyrymy mol deseıshi» degen oı atoılap turdy, qazaq halqyna alǵysyn aıtyp jatty.
Cheshen-ıngýsh etno-mádenı birlestiginiń tóraǵasy Elbrýs Tımaev: «Ashtyqta jegen quıqanyń toqshylyqta dámi aýzyńnan ketpeıdi» degen, búkil tutas halyq «jaý» bolyp, olardy vagondarmen Qazaqstanǵa ákep tókkende, qazaqtar olardy úılerine kirgizip, qoltyǵyna tartyp, bir úzim nanyn bólip berdi. Eń bastysy, osy azyp-tozyp kelgen halyqqa qazaqtar qorlamaı, qurmetpen qarady, olardyń qaıǵysyn bólise bildi. Osyndaı adamgershilikti umytýǵa bola ma? Al qazir Elbasy júrgizip otyrǵan saıasat cheshender men ıngýshtarǵa óz ulttyq dástúrin, tilin, dinin umytpaq túgel, ony damytýǵa múmkindik berip otyr. Mundaıdy baǵalamaýǵa, alǵys aıtpaýǵa bola ma? Allanyń qudiretimen qazaq jerine tap bolǵan qandaı ulystyń da joly boldy, baǵy ashyldy. Elmen birge olar da damydy, baqytty kúnder keship otyr. Al biz endi qazaq memleketin Máńgilik el etýge birigip, kúsh salýymyz kerek. Osy oıdy urpaǵymyzdyń boıyna sińirýimiz qajet», – dedi. Jurtshylyq aldynda túrli ulystar ókilderi óner kórsetti.
Názıra Járimbetova.
Derek, sýret: egemen.kz.