О́skemende Qazaqstannyń voleıboldan áıelder komandalary arasynda XXIV ulttyq lıga chempıonaty márege jetti. Onyń qorytyndysynda jergilikti «Altaı» klýby chempıon atandy.
О́skemendikter fınaldyq kezdesýde Taldyqorǵannyń «Jetisýyn» utty. Chempıondarǵa altyn medal men kýbogty Shyǵys Qazaqstan oblysynyń ákimi Danıal Ahmetov tabys etti. Jeńimpazdar, sondaı-aq, oblys ákimdiginiń 5 mıllıon teńgelik sertıfıkatyn aldy. «Altaıdyń» úsh oıynshysy voleıbol federasııasynyń arnaıy syılyǵyna ıe boldy. Atap aıtqanda, birinshilikte erekshe kózge túsken Irına Lýkomskaıa – úzdik baılanystyrýshy, Olga Bırıýkova úzdik shabýylshy dep tanylsa, Inna Matveeva eń baǵaly oıynshy atandy. Endi «Altaı» áıelder voleıbol klýby aǵymdaǵy jyldyń 3-13 qyrkúıek kúnderi Fılıppınde ótetin klýbtyq komandalar arasyndaǵy Azııa birinshiligine qatysady.
Esterińizge sala keteıik, osydan birneshe kún buryn Shyǵys Qazaqstan oblysynyń «Altaı» erler voleıbol quramasy da el chempıonatyn utyp, qurlyqtyq básekege joldama alǵan bolatyn.
Dýman ANASh,
«Egemen Qazaqstan».
О́SKEMEN.