Ońtústiktiń jeri qunarly. Shybyqty teris qadasań da sazdaý jer bolsa ónip ketedi. Qolqasynan kók ýly tútin aqtarylatyn mashınalar kóbeıgen zamanda ekologııalyq ahýaldy ońaltý úshin ormandy alqaptardyń kóbeıgeni ábden kerek.
Jaqynda OQO tabıǵı resýrstar jáne tabıǵat paıdalanýdy retteý basqarmasynyń uıytqy bolýymen Ordabasy aýdanynda «Otan aǵashy» aksııasy ótti. Jergilikti jurt aýyzynda «Leshoz» dep atalatyn alqap kezinde qońyr kúzde jemisi kózdiń jaýyn alatyndaı baý-baqsha bolǵan eken. Osylaısha, «Badam orman sharýashylyǵy jáne janýarlar álemin qorǵaý jónindegi» mekemesi orman qorynyń 60 gektar jerine 25 myń kóshet otyrǵyzyldy.
– Kógaldandyrý jumystary elimizde jappaı qarqyn alýda. «Sebebi, bul bizdiń bolashaq urpaqqa, ózimizge jáne Tabıǵat anaǵa jasap otyrǵan syıymyz. Bul ıgilikti iske árbir azamat atsalysýy qajet. Ásirese, jastardyń qatysýy asa mańyzdy», degen bolatyn Elbasy N.Nazarbaev. Osy oraıda jáne oblys ákimi B.Atamqulovpen bekitilgen «QR Táýelsizdiginiń 25 jyldyǵyn atap ótý boıynsha Ońtústik Qazaqstan oblysynyń is-sharalar josparyn» oryndaý maqsatynda 25 myń túp jemis aǵashy otyrǵyzyldy. Jemis aǵashtaryn tańdaǵan sebebimiz, olardyń kógergeni, gúldegeni óte ádemi. Ekinshiden, ósip kele jatqan keleshek urpaqqa óziniń jemisin berip, jastardyń nazaryn aýdaratyndaı bir baý-baqsha bolsyn deımiz. Oblys aýmaǵyn jasyl jelekke aınaldyrý maqsatynda qolǵa alynǵan shara aldaǵy ýaqytta da óz jalǵasyn tabady, – deıdi oblystyq tabıǵı resýrstar jáne tabıǵat paıdalanýdy retteý basqarmasynyń basshysy Muhıt Otarshıev.
Ońtústik Qazaqstan oblysyndaǵy orman qorynyń jeri 3 132,2 myń gektar bolsa, onyń ishinde 1 573,7 myń gektary ormandy dala. Sekseýil alqaptary da jyl saıyn ulǵaıyp keledi. Mysaly, ótken jyly orman qorynyń 16418 gektar alqabyna sekseýil tuqymy sebilgen. Sondaı-aq, oblys eldi mekenderin kógaldandyrýda 3126,1 gektar jerge 1294,6 myń túp aǵash kóshetteri otyrǵyzylypty.
Jas kóshetter tez tamyr alsyn deseńiz sýdan taryqtyrýǵa bolmaıdy. Al, alqap janynda dermene dánin jegen balyǵymen aty shyqqan «Bógen» sý qoımasy bar. Iаǵnı, sýdan tapshylyq joq. Jasyl jelekti kútimge alǵan dıqandar kóshetter aralyǵyndaǵy bos jerlerge qaýyn-qarbyz egýdi oılastyrýda. Jemis-jıdek, baý-baqsha ónimderi kóp bolsa baǵa da arzandaıdy. Bylaı aıtqanda, basqarma osy tyndyrǵan jumysy arqyly eki jep bıge shyǵyp otyr.
Baqtııar TAIJAN,
«Egemen Qazaqstan».
Ońtústik Qazaqstan oblysy.