Joǵary oqý ornynyń 82 jyldyq asa baı tarıhy Qazaqstannyń akademııalyq ǵylymy men joǵary mektebiniń qarqyndy damýymen tyǵyz baılanysty. QazUÝ-dy elimizdiń barlyq joǵary bilim berý júıesiniń tiregi, bilikti mamandar ordasy deýge bolady. Ýnıversıtettiń túlekteri Qazaqstannyń jáne onyń aýmaǵynan tys jerlerdegi óndiristiń barlyq salalarynda jemisti eńbek etýde.
Búginde ál-Farabı atyndaǵy QazUÝ elimizdegi kósh bastap turǵan joǵary oqý oryndary arasyndaǵy Qazaqstan Respýblıkasy Prezıdentiniń «Sapa salasyndaǵy jetistikteri úshin» syılyǵynyń birinshi ıegeri. Quacquarelli Symonds (QS, Ulybrıtanııa) agenttiginiń zertteýlerine sáıkes, ál-Farabı atyndaǵy QazUÝ bilim berý baǵdarlamalary boıynsha 305-orynǵa turaqtandy. Ál-Farabı atyndaǵy Qazaq ulttyq ýnıversıteti TMD ýnıversıtetteri arasynda úshinshi orynda.
UNIFORM Project Halyqaralyq konsorsıým negizinde Tokıo ýnıversıtetimen birigip Qazaqstan tarıhynda birinshi ret sırek kezdesetin joba otandyq nanospýtnıkti ázirleý jumystary júrip jatyr. Bul ázirleme basqa da jobalar sııaqty EKSPO-2017 kórmesinde tanystyrylmaq.
Ýnıversıtettiń mıssııasy – elimizdiń qoǵamdyq ómiri men ǵylymyna, ekonomıkanyń mańyzdy baǵyttarynyń qarqyndy damý máselelerin sheshýge baǵyttalǵan zamanaýı, joǵary bilimdi, básekege qabiletti mamandar býynyn qalyptastyrý.
QazUÝ qalashyǵynyń barlyq aımaǵy Wi-Fi symsyz jelisimen qamtylǵan. Onyń kez kelgen jerinde ár stýdent ýnıversıtet birlestiginiń jelisinde jumys isteýmen qatar, ınternetke aqysyz qosylý múmkindigine ıe. Sonymen qatar, táýlik boıy isteıtin 300 oryndyq jańa Internet-kafe jumys isteıdi.
QazUÝ 400-den asa shetel ýnıversıtetterimen ózara yntymaqtastyq týraly kelisimshart jasasqan. Kelisimshart negizinde magıstrant, doktoranttarǵa eki adamnyń jetekshilik etý tájirıbesi keńinen óristep otyr. Bir ǵylymı jetekshi Qazaqstannan bolsa, ekinshisi – sheteldik JOO-daǵy belgili ǵalym. Osynyń barlyǵy QazUÝ stýdentteri úshin halyqaralyq deńgeıde oqyp, zertteýler júrgizýge laıyqty jol ashady.
Rabıǵa BOLATOVA,
ál-Farabı atyndaǵy
Qazaq ulttyq ýnıversıtetiniń
4-kýrs stýdenti.
ALMATY.