Qazaqstan Respýblıkasy Prezıdenti janyndaǵy Áıelder isteri jáne otbasylyq demografııalyq saıasat jónindegi ulttyq komıssııa men Qazaqstandaǵy BUU Damý baǵdarlamasy «Áıelderdiń quqyqtary men múmkinshilikterin keńeıtý» jobasy aıasynda, «Expo&Women» halyqaralyq uıymy jáne «Aqbota» qoǵamdyq uıymymen birlesip «Jasyl tehnologııalardyń ulttyq akademııasy» bilim taratý ortalyǵynda «Áıelder bıznesin damytýǵa arnalǵan jasyl tehnologııalar» taqyrybynda semınar-trenıng ótkizdi. Onyń jumysyna Aqmola oblysynyń otyzdan astam isker áıelderi qatysty.
Semınardyń ashylý rásiminde Parlament Májilisiniń IV-V shaqyrylymynyń depýtaty Aıgúl Soloveva, «EXPO&WOMEN» halyqaralyq uıymynyń tóralqa tóraıymy Saltanat Raqymbekova, Prezıdent janyndaǵy Áıelder isteri jáne otbasylyq demografııalyq saıasat jónindegi ulttyq komıssııa hatshylyǵynyń meńgerýshisi Erlan Raıǵanıev, «Aqbota» qoǵamdyq qorynyń dırektory Tatıana Nemsan quttyqtaý sóz sóılep, «Jasyl tehnologııalardyń ulttyq akademııasy» ortalyǵy úlgisindegi «jasyl keshenderdi» qurý men paıdalanýdyń artyqshylyǵy týraly áńgimeledi.
Arnasaı aýylynda ótken mańyzdy sharanyń negizgi maqsaty áıelderdi EKSPO-2017 kórmesiniń jumysyna jumyldyrý, Aqmola oblysyndaǵy kásipker áıelderge «jasyl» kásipkerlikti uıymdastyrýdy úıretý, jeke kásipkerlikti damytýda jáne ekologııalyq taza aýylsharýashylyq ónimderin óndirýde «jasyl» tehnologııalardy qoldanýdy nasıhattaý bolyp tabylady.
Osy rette bilim taratý ortalyǵy 2015 jyldyń 4 qyrkúıeginde Ulttyq komıssııa men BUU Damý baǵdarlamasynyń qoldaýymen ashylǵanyn aıta ketkimiz keledi. Jarty jyl ishinde ortalyqta respýblıkanyń barlyq óńirlerinen jáne Tájikstan, Qyrǵyzstannan 500-deı adam oqý dáristerine qatysty.
Ortalyq pırolız peshi, kún paneli men kollektorlary, qudyǵy jáne sorǵyshtary, jaryqdıodty jáne fıtodıodty jaryqtandyrý, sensorly kótergish, energotıimdi terezeler jáne t.b. tehnologııalarmen jabdyqtalǵan. Sonymen qatar, munda Qazaqstannyń qubylmaly aýa raıy jaǵdaıynda bıogýmýs tehnologııasynda jyl boıy kókónister ósiriletin bıovegıtarıı jylyjaıy, AQSh mamandarynyń nusqaýlyǵymen ósiriletin arnaıy dárýmendendirilgen jasyl kók ósiretin jáne tamshylatyp sýarý júıesi engizilgen fıtodıodty jylyjaıy ornalasqan. Semınardyń alǵashqy kúninde oǵan qatysýshylar atalǵan erekshe nysandardy aralap, ozyq tehnologııany qoldaný tájirıbesimen tanysty.
Spıkerler «Jasyl» ekonomıkany qoldaý jáne G-Global-dy damytý koalısııasy» ZTB atqarýshy dırektory Ashat Súleımenov, Nazarbaev Ýnıversıtet tehnoparkiniń dırektory Dııaz Baıseıitov, «Báıterek» korporasııasy» JShS menedjeri Radmıla Vasılchýk, halyqaralyq deńgeıdegi bıznes-keńesshi Oleg Mesık, «KunTech» JShS damý jónindegi dırektory A.Qalıev kópsalaly tehnologııanyń zamanaýı erekshelikteri týraly sheberlik synyptaryn ótkizdi.
Sonymen qatar, is-sharada eń úzdik «jasyl» tehnologııalar derekqorynyń tusaýkeseri ótkizilip, otandyq jańashyldardyń jetistikteri jaıly, álemdegi «jasyl» kásipkerliktiń damýy, áleýmettik kásipkerliktiń ekologııalyq brendi, erikti ekotańba jáne naryqtaǵy «jasyl» taýarlardyń ósýi jaıly máseleler talqylandy.
Semınar-trenıng aıasynda, Antonıo Serıllo basqarǵan ıtalııalyq delegasııa «Aýyl sharýashylyǵyndaǵy ınnovasııalyq «jasyl» tehnologııalar» taqyrybynda dóńgelek ústel májilisin ótkizdi. Italııalyq «jasyl» kásipkerlik ókilderi «LTMBULLLtd» kompanııasynyń basshysy Antonıo Latella, «ArchEnerdjıgrýpEsko» basshysy Fabrısıo Sersante óz tájirıbeleri men memleketterinde «jasyl» tehnologııalardy qoldanýdyń barysy jaıly aıtyp beredi.
Baqbergen AMALBEK,
«Egemen Qazaqstan».
Aqmola oblysy,
Arshaly aýdany.