Áleýmettik áriptestik álsiremeıdi

Eýrazııalyq top 22 jyldan beri óńirdegi áleýmettik ıgilikterdiń júzege asýyn qoldap, Qostanaı oblystyq ákimdigimen áleýmettik áriptes bolyp keledi. Osy ýaqytqa deıin dúnıejúzindegi ken óndiretin qýatty kásiporyndar qatarynan sanalatyn Eýrazııalyq top basqarmasy jaqynda oblys ákimi Arhımed Mu­hambetovpen eki memorandýmǵa qol qoıdy. Eýrazııalyq toptyń basqarma tóraǵasy Aldııar Qaztaev pen oblys ákimi Arhımed Muhambetov qol qoıǵan, onyń alǵashqysy Qostanaı óńirinde ınfraqurylymdyq másele­lerdiń sheshimin tabýyna kómek beredi. Bıyl ERG memorandým sheńbe­rinde oblysqa 1,3 mıllıard teńge beretin boldy. Bul qarjy ótken jyl­dardaǵy sekildi óńirdegi ma­ńyzdy áleýmettik jobalarǵa jum­salady. Mysaly, Rýdnyı qalasynda «Sokolov» stansasynan Vasılev býlan­dyrǵyshyna deıingi sý naso­synyń jóndeý jumystary, Arqalyq, Qostanaı qalalaryndaǵy ortalyq stadıondardy qaıta jańǵyrtý, Aman­geldi aýdanyndaǵy batyr mýzeıin jóndeý jumystary osy qarjyny kútip tur. Ekinshi memorandýmǵa respýblı­kalyq «Atameken» ulttyq kásipkerler palatasy basqarmasynyń tóraǵasy Abylaı Myrzahmetov, Eýrazııalyq toptyń menedjerler keńesiniń tóraǵasy Aleksandr Mashkevıch pen oblys ákimi Arhımed Muhambetov qol qoıdy. Bul shara sheńberinde oblys óńirinde shaǵyn jáne orta bıznesti damytý úshin jobalar júzege asatyn bolady. Oblys ákimdigi men Ulttyq kásipkerler palatasy óńirde halyqty jumyspen qamtý maqsatynda kásipkerlikti qarjylandyrý úshin shaǵyn nesıe uıymyn qurýǵa bátýa­lasty. Bul uıym kásibin endi bastaǵan kásipkerlerdi yntalandyrý, olardyń tájirıbesin tolyqtyrý úshin yńǵaıly, jeńil nesıemen qarjylandyratyn bolady. Eýrazııalyq top kásipkerlerdiń «Atameken» ulttyq palatasyna 300 mıllıon teńge qarjy bóledi, osyndaı kólemdegi qarjyny oblys ákimdigi de beredi. Bul qarjyǵa negizinen Rýdnyı, Lısakov, Arqalyq qalalary turǵyndarynyń shaǵyn kásip­kerlikpen aınalysýyna múmkindik jasalady. Oblys ákimi eki memorandýmnyń ózara baılanysty ekenin aıtqan bolatyn. Olardyń ekeýi de óńirdegi negizinen Eýrazııalyq topqa kiretin óndiris oryndarynyń turǵyndary turatyn Rýdnyı, Arqalyq, Lısakov qalalary men Kachar kentiniń tur­ǵyndaryna arnalǵan áleýmettik jáne kásipkerlik jobalardy júzege asyrýǵa arnalady. Eýrazııalyq toptyń quramyna Qostanaı oblysynda ornalasqan ken alyby Sokolov-Sarybaı ken óndirý birlestigi, «Qazaqstan alıýmınıiniń» fılıaldary bolyp sanalatyn Kras­nooktıabr jáne Torǵaı boksıt ken óndirý basqarmalary kiredi. Osy úsh óndiriste 24 myńǵa jýyq adam jumys isteıdi. Tek Sokolov-Sarybaı ken óndirý birlestigindegi jumysshylar sany 19700-den asady. Oblys ákimi Arhımed Muham­betov memorandýmǵa qol qoıý kezin­de óńirdegi Eýrazııalyq topqa kiretin óndiristegi jumysshylar jala­qysynyń ósetindigin, ol maq­satta Eýrazııalyq toppen kelisip otyr­ǵandyǵyn da aıtyp ketti. Áleýmettik áriptestik barda dú­nıe­ni teńseltip otyrǵan daǵdarysqa óńir­degi óndiris pen áleýmettik sala­nyń qaıyǵy qaıyrlamaıdy. Názıra JÁRIMBETOVA, «Egemen Qazaqstan». QOSTANAI.