«Barmasań, kelmeseń jat bolasyń» deıdi halyq danalyǵy. Qazaqstanda tórt myńnan astam ırandyq aǵaıyn bar. Taǵdyr talaıymen atajurtynan ajyraǵan olar baqytyn qazaq jerinen tapty. О́sti, óndi, qazaqtyń enshi alyspaǵan bir balasyndaı sińisip ketti. Olar Irandaǵy týystaryna baryp turady.
Jaqynda Ońtústikke ystyq yqylas, týysqandyq sezimin qanatymen sý sepken qarlyǵashtaı alyp ushyp, Iran memleketinen arnaıy delegasııa keldi. Dástúrge aınalǵan mádenı shara osymen segizinshi ret uıymdastyrylǵan. Iran horeografııalyq «Persen soka» bı ansabliniń ónerine ońtústikqazaqstandyqtar tánti bolyp, rızashylyqtaryn bildirdi.
Iran Islam Respýblıkasynyń Qazaqstandaǵy elshisiniń keńesshisi Masýd Sheıh Zeıneddınniń Shymkentke ekinshi ret kelýi eken. Áýlıe-ámbıelerge baı, tarıhy qalyń Shymkent shahary oǵan ábden unapty.
– Qazaqtar óte aqjarqyn, aqpeıil halyq. Bizdiń osyndaǵy týysqandarymyz ózin tarıhı otanynda júrgendeı sezinedi. Memleket basshysy Nursultan Nazarbaevqa degen qurmeti bólek. Eldegi jasalyp jatqan jaqsy isterge úles qosyp júrgenderdiń qatarynda Iran jurtynyń da bolýy kóńildi ósiredi. Biz týysqan halyqpyz, – deıdi ol.
Qazaq eliniń yqylasyna toıǵan ırandyqtar taǵy da kelmek nıette.
Baqtııar TAIJAN,
«Egemen Qazaqstan».