ASTANA. 5 sáýir. Alatau Invest Capital men Qostanaıdaǵy Allur Group kompanııasy arasynda ınvestısııa tartý jáne strategııalyq seriktestik týraly memorandým jasaldy. Bul týraly egemen.kz tilshisi habarlady.
Osyǵan oraı, jolaýshylar avtomobılderi, jeńil kommersııalyq júk mashınalary, aýyr júk mashınalary, avtobýstar óndirisi; ulttyq qazaqstandyq avtomobıl brendin qurý; Qostanaı oblysynda jalpy aýdany 400 gektar ındýstrııalyq aımaq qurý jáne damytý; ǵylymı-zertteý jáne konstrýktorlyq baza qurý baǵyttaryna ınvestısııa tartylmaq. Sondaı-aq, josparǵa avtomobıl óndirisi úshin kadrlardy daıyndaý jáne biliktiligin arttyrý, jańa aldyńǵy qatarly avtomobıl jasaý tehnologııalarynyń transferti kiredi. Ortaq maqsat – ulttyq qazaqstandyq avtomobıl klasterin damytý.
Yntymaqtastyqtyń birinshi kezeńinde JAC jáne Peugeot jeńil avtomobılderiniń CKD*-jobasy, kommersııalyq tehnıka men avtobýstardyń CKD-jobasy syndy eki iri joba júzege asyrylady. Jobadan avtoklasterdi jáne Qazaqstan úshin basym basqa da salalardy damytýdaǵy perspektıvalar, jalpy aımaqtyq ónimdi arttyrý, qosymsha sheteldik ınvestısııa tartý, jańa jumys oryndaryn qurý, sondaı-aq, aımaqta ónerkásipti damytýǵa jaǵdaı jasaý kútilip otyr.
«Biz eń iri qazaqstandyq ınnovasııalyq kompanııalardyń biri – Allur Group-qa ınvestısııa tartý úshin memorandýmǵa qol qoıdyq. Qostanaıdyń ındýstrııalyq aımaǵynyń aıasynda jergilikti avtokólik óndirisin ary qaraı arttyrý úshin birlesip jumys isteımiz. Bul – tolyq oryndalatyn mindet. Mysaly, SsangYong Nomad markaly avtomobılderdiń otandyq bólikteri búginniń ózinde shamamen 40 paıyzǵa jetti, kommersııalyq modelderde bul deńgeı 50 paıyzǵa jetedi. Bizdiń Qazaqstanda óndiriletin qosalqy bólshekterdiń sanyn arttyrmaqpyz. Osylaısha bizdiń elimizde shyǵarylatyn avtomobılderdiń qazaqstandyq bóligin arttyrsaq deımiz», – dedi Alatau Invest Capital-dyń basqarýshy seriktesi Qaırat Satybaldyuly.
Allur Group dırektorlar keńesiniń tóraǵasy Andreı Lavrentevtiń aıtýynsha, kompanııa 2018 jyldan bastap Qostanaıdyń ındýstrııalyq aımaǵynyń aıasynda, sonyń ishinde eksportqa shyǵarý úshin jylyna 40 myń avtomobıl qurastyrýdy josparlap otyr.
«Bizdiń esebimiz boıynsha, 2022 jylǵa deıin ónim shyǵarýdyń ortaq kólemi 700 mlrd.-tan astam teńgeni quraıdy. Onyń ishinde 7 jyldyń ishinde tek eksport shamamen 418 mlrd. teńgeni quraıdy. Aıqyndalǵan josparlardy iske asyrý úshin 500-den astam jańa bilikti jumys ornyn qurý qajet bolady. Al jergilikti óndiris deńgeıi 50 paıyzǵa jetedi», – deıdi Andreı Lavrentev.
Memorandýmǵa qol qoıý sharasyna qatysqan Qostanaı oblysynyń ákimi Arhımed Muhambetov ınvestısııa tartý boıynsha memorandým zaýyt jumysyna jańa serpin beretinin aıtty.
«Bizdiń oblysymyzda qarqyndy damyp kele jatqan ónerkásip salalarynyń biri – avtomobıl jasaý. Indýstrııalandyrý baǵdarlamasy boıynsha oblysta 81 ınvestısııalyq joba, sonyń ishinde avtomobıl jasaýda 4 joba iske asyryldy. Allur Group zaýyttary aıqyn turaqty damyp keledi. Ol óndiristi retke keltirip, avtomobıl jasaýdy damytýda ınvestısııa tartyp qana qoımaı, búkil aımaqtyń qolaıly damýyna jaǵdaı jasaýda», – dedi oblys ákimi.
Barlyq joǵaryda atalǵan jobalardy júzege asyrý Keden odaǵy elderinde ǵana emes, sonymen qatar halyqaralyq arenada avtomobıl jasaý salasynda Qazaqstannyń básekege qabilettiligin arttyrýǵa baǵyttalǵanyn atap ótken jón.
Elaman Qońyr.
Derek, sýret: egemen.kz.